《中年好聲音4》「頭號殺手」范子睿即興清唱《有心人》氹掂女檔販 成功半價入手生果

《中年好聲音4》本周日（5日）晚上8點翡翠台播出「黑白榮耀換位賽」最終回。

上弦黑隊「頭號殺手」范子睿來自廣州，雖然由細睇TVB(TVB)劇大，但就唔算成日嚟香港，所以開賽前節目組特登帶佢去果欄打卡，仲玩埋「TVB(TVB)冇乜嘢劇喺呢度拍」快問快答，對於一直睇TVB(TVB)劇長大嘅子睿當然零難度。之後子睿去生果檔買生果，落足口水氹姨姨畀折頭，仲即場清唱《有心人》，氹到姨姨笑到見牙唔見眼，最後子睿成功用半價買到一盒士多啤梨。子睿坦言最初參加《中4》只係諗住上到電視就收貨，但當評審畀佢5燈兼大讚佢唱功勁，子睿當時直認有啲唔知點反應：「其實我真係唔知自己勁喺邊，所以唔知畀咩反應。」子睿又覺得《中4》好似一個加油站，身邊個個都會同佢講「加油」等鼓勵說話，令佢覺得好有愛。

返到比賽，子睿再次挑戰慘情歌，揀咗唱《怎麼說我不愛你》。上次佢以「失戀癲佬Look」演繹《忘情冷雨夜》，今次就唔再披頭散髮，Gel到All Back頭，以「乾淨」型格Look見人。唱完之後子睿仲自讚：「其實細心嘅朋友肯定會發現我今日靚仔咗。」海兒一聽即刻皺眉兼扁嘴，擺出難以置信嘅樣，相當搞笑。不過海兒都讚子睿處理輕、重聲好出色：「輕，你永遠聽得清楚佢嘅輕；重，永遠都唔會覺得佢吵耳。」

相片來源: 《中年好聲音4》

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。