戴祖儀首踏舞台劇舞台 陳曉華周嘉洛蔣祖曼現身撐場 送「靈芝樹」搞到佢笑爆嘴？

《正義女神》一班演員戲入面同戲外都好老友，日前戴祖儀（Joey）挑戰人生第一次演舞台劇，仲有劇中拍檔周嘉洛、蔣祖曼同好友陳曉華到場力撐。佢哋除咗親身嚟打氣，仲特登諗橋送咗一棵「靈芝樹」做賀禮，戴祖儀又驚喜又忍唔住笑爆嘴，睇得出大家私底下真係老友鬼鬼。

受訪時，周嘉洛話呢個主意出自「家姐」蔣祖曼，佢仲同蔣祖曼一齊講笑，話覺得呢棵靈芝樹同戴祖儀好襯，寓意「長壽、尊貴、年年有今日」。蔣祖曼之後就正經補多句，解釋點解真係要送靈芝樹：「嗰陣拍《正義女神》時，我同Joey同房，當時Joey喺房入面就種咗盆植物，所以一見到盆靈芝樹，就決定一定要送畀Joey。」

第一次企上舞台劇舞台嘅戴祖儀，要喺一個半鐘嘅獨腳戲入面又跳又唱，表現真係令人眼前一亮。蔣祖曼事後亦喺社交平台大讚：「好叻女呀 Joey！」面對前輩嘅肯定，加上好友送上嘅「重磅」賀禮，戴祖儀就鬼馬回覆：「Love u guys soo much~~我會好好養育嗰棵靈芝😂」。

合照入面，大家圍住棵靈芝大擺搞怪 Pose，成個畫面又搞笑又溫馨，網民都紛紛留言：「呢份賀禮真係夠晒補」、「正義女神劇組感情真係好」、「Joey 演獨腳戲咁犀利？」

相片來源: TVB娛樂新聞台& IG@jomanchiang

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。