《正義女神》樂珈嘉為拍番外篇剪短頭髮　重現「邱天雪」

Release date: 2026-04-09 15:00 | Entertainment News

《正義女神》而家熱播中！劇入面除咗有視后佘詩曼，仲有陳煒、譚耀文同已故藝人許紹雄等一眾好戲之人，上演精彩絕倫嘅對手戲；而一班新生代演員嘅表現同樣相當搶焦。好似飾演佘詩曼繼女「邱天雪」嘅樂珈嘉，早前官方釋出嘅「少年犯罪」海報入面見到佢塊面有多處傷痕，唔單止引爆網民好奇心，仲有唔少人留言撐佢。

一向同網民互動得好密嘅樂珈嘉，日前喺社交網上載咗條短片，原來係為咗拍攝《正義女神》番外篇，要重現「邱天雪」造型，所以一刀剪走留咗年半嘅長髮。

樂珈嘉喺帖文寫道：「拍2日前留長年半嘅頭髮👀其實短頭髮好似都幾啱我？！」對於辛辛苦苦先留長嘅頭髮，佢一開始都有啲唔捨得；但當髮型師幫佢剪走一邊長髮之後，佢就接過鉸剪，好爽手剪埋另一半。見到自己重現邱天雪嘅造型，佢開心講：「即刻覺得邱天雪返返嚟」！唔少網民都大讚佢新造型：「短頭髮仲靚」、「邱天雪welcome back」、「兩個都很喜歡」。