《魔音女團》練習生新造型首曝光 莊子璇倪嘉雯重演海選舞台

《魔音女團》將於5月4日起開播，一連十集，逢周一至五晚10時30分喺翡翠台播映。

TVB日前（18日）午間喺荷里活廣場舉行《海馬牌床褥呈獻：魔音女團》練習生首次見面會，李尹嫣、穎喬、邢慧敏、鄧凱文、宋宛穎、倪樂琳、王汛文、盧映彤、俞可程、廖慧儀、倪嘉雯、莊子璇、喬美莎、陳熙蕊同葉靖儀，首次以《魔音女團》練習生身份公開亮相。

活動一開始，一班練習生着住團服出場，做過形象改造之後，愈嚟愈有女團氣勢。大會仲率先隆重首播比賽歌《Lucky Star》MV，片段入面練習生着白色軍服跳唱，型格十足。之後佢哋逐個分享接受《魔音女團》特訓嘅心路歷程，包括跳唱技巧進步、節食健身同形象改造等。大會亦安排練習生重現海選嘅人氣演出項目，包括穎喬同喬美莎表演跳舞、鄧凱文Rap自創歌、倪嘉雯Rap《風生水起》、李尹嫣獻唱《枇杷》，以及莊子璇獻唱《戀人未滿》，等觀眾可以提早睇到佢哋嘅蛻變成果。另外，主持蕭正楠亦有到場，除咗推介節目內容，仲分享點樣見證練習生嘅成長同追夢過程，為佢哋打氣。出席記者會嘅仲有監製晴朗，而記者會司儀就由阮浩棕擔任。

《海馬牌床褥呈獻：魔音女團》由陳潔靈、陳奐仁擔任「班主任」，蕭正楠主持，16名練習生包括：李尹嫣、穎喬、邢慧敏、鄧凱文、宋宛穎、倪樂琳、王汛文、盧映彤、俞可程、廖慧儀、蔡華英、倪嘉雯、莊子璇、喬美莎、陳熙蕊、葉靖儀。練習生之後會接受一連串密集式特訓，大會亦會提供化粧、服裝同舞蹈指導，務求盡快令佢哋脫胎換骨，成為專業跳唱女團。專業團隊陣容包括：助教冼靖峰、黃洛妍、文佐匡、形象指導馬天佑、服裝指導兼第一屆剪裁魔法師冠軍 Kev Yiu、美妝指導 Cammy，並由 YS 韓國偶像學院提供舞蹈訓練。節目期間會分階段淘汰練習生，觀眾將見證佢哋由魔音進化至 Magic Voice，成軍出道嘅勵志追夢之旅。

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。