《正義女神》顏仟汶控制狂母親打爛門鎖逼瘋女兒　窒息式管教引爆熱議

《正義女神》昨晚（20日）一集，顏仟汶演的「控制狂」母親，表現得好到位，令人看得肉緊！顏仟汶係雅文阿Cat（陳若思飾）的母親，對女兒管教嚴厲，不但唔畀佢同同學聊天，亦唔准佢參與課外活動，只可留喺屋企溫習。

之後因為雅文遲返屋企而報警求助，兩母女更因此嘈交，顏仟汶一度發狂拎槌仔打爛女兒房間門鎖，樣子兇狠，亦大罵「你以為鎖咗門我就開唔到呀！」、「我聽日就搵人返嚟拆咗度門」。

另一幕係雅文被捕為殺貓兇手，顏仟汶上庭作供時自言「唔識教女」，唔讓女兒參加任何課外活動，亦唔想佢胡亂識人，原因係想佢努力讀書；她指自己咁做只係想保護佢，上網打機會阻住佢讀書，所以沒收手機，每日放學都要天黑前返到屋企，如當日要加班，就要佢返到屋企用屋企電話同佢報到，將控制女兒瘋狂的一面展現出嚟。

不少網民都讚顏仟汶演得淋漓盡致，亦指因婚姻失敗而將情緒發泄到女兒身上，並要控制女兒一舉一動，完美呈現出那份窒息的愛。亦有留言話「演技太好了」、「我係囡囡都被你逼瘋」、「恐怖媽媽」。

另外，顏仟汶亦喺社交網分享角色感受：「演完《正義女神》Cat媽媽Sandy，心情久久未能平復💔睇返自己砸門砸鎖、強行管控啊女嘅戲份，內心真係五味雜陳。」

她亦希望家長適時放手，互相尊重，指拍攝時自己已經好唔認同呢種令人窒息嘅愛，亦指仔女唔係父母嘅附屬品，更唔係用來圓夢、滿足期望嘅工具。她認為小朋友成長需要空間同尊重，唔好捉得太緊，多啲信任佢哋、少啲壓力同責備，用心栽培，識得放手，仔女先可以自在長大、向陽而生。

相片來源: 《正義女神》截圖

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。