郭藹明素顏遊貴州「靚到發光」劉青雲被認出後社恐舉動獲讚勁得意

Release date: 2026-04-22 12:00 | Entertainment News

劉青雲同郭藹明（Amy）結婚多年，一向都係圈中模範夫婦。近日佢哋暫時放低工作，繼新疆、雲南、廣東、河南之後，有網民喺貴州荔波小七孔景區見到二人出現。

現年58歲嘅郭藹明依然好識穿搭。當日佢着淺藍色襯衫配牛仔褲，頸上還繫鮮黃色絲巾，簡約之中加添一抹亮色。郭藹明keep住全素顏出鏡，撐紙傘坐喺竹筏上，皮膚白皙氣色紅潤，因而被大讚「靚到發光」，優雅氣質十年如一日。

同場嘅影帝劉青雲就一如既往貼地，着橙色T恤戴鴨舌帽，完全冇巨星架子。當兩人並肩坐喺竹筏漂流被遊客認出時，反應就好唔同：郭藹明心情極佳，不停大方揮手；劉青雲則似乎有啲「怕醜」，微笑打招呼後就默默低頭玩手機。

不過最後兩位都大方同粉絲喺瀑布前合照，親民舉動亦贏晒口碑。有網民留言：「郭藹明個紙傘Look好有仙氣」、「相處好自然、好有愛」、「影帝係咪又社恐？一如既往咁可愛」。

相片來源: 小紅書影片截圖

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。

Originally published in TVB.COM

Shopping Cart