95歲胡楓6月7踏第六次紅館 舉辦《九五至尊》挑戰世界紀錄

95歲嘅胡楓（修哥）將於6月7日（星期日）下午3時30分，以95歲高齡第六度踏上紅館舞台，舉行《修哥九五至尊無限楓騷演唱會》。大會昨日（22日）特別安排演唱會記者會，公布詳情。

記者會一開始，大會先播放一段精心剪輯影片。影片上半部講修哥入行以來嘅精彩戲劇人生；下半部就重温修哥由2002年到2022年之間，一次又一次打破自己同香港紀錄嘅五次紅館個唱。全場嘉賓睇完即刻報以熱烈掌聲，修哥亦喺六位美女陪伴下，以「朕」身份出場，坐上為今次「九五至尊」主題而特製嘅龍椅，接受現場掌聲同喝采。

大會更特別邀請陳欣健同麥美恩以娛樂大臣身份擔任司儀，兩人風趣又幽默嘅司儀風格，令現場不斷充滿笑聲，亦令大家享受修哥同他們之間嘅互動。

另外，大會公布《九五至尊無限楓騷演唱會》正式啟動時亦好有心思。因為修哥今次係「九五至尊」即係「朕」，大會特別草擬「聖旨」，內容包括九五至尊無限楓騷演唱會將於丙午馬年新曆六月假香港體育館舉行，並提到係香江開埠以來藝壇史無前例嘅95歲松柏藝人演唱會，邀約全港紅星紅人聚首紅館，共襄盛典等；最後亦寫明市民可盡快搶購門票，免得向隅。

主持朗讀聖旨後，修哥即時「批奏」並以玉璽蓋章，讓全港市民於6月7日下午3時30分喺紅館迎接呢場令人期待、星光熠熠嘅演唱會。

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。