《2026香港小姐競選》即日起全球招募 郭柏妍重現經典踩板 倪樂琳開篷車飄逸長髮搶Fo

由電視廣播有限公司主辦、全城關注嘅選美盛事《2026香港小姐競選》全球招募就快展開，即日（4日）起接受全球佳麗報名。今年大會以「敢 · 至完美」做招募主題，希望參選佳麗勇於接受挑戰、夠膽展現真我、力臻完美，截止報名日期係5月25日。

為咗隆重其事，TVB今午喺電視廣播城開盛大記者會，仲會首播由港姐倪樂琳、郭柏妍同陳楨怡拍攝嘅宣傳短片畀大家搶先睇！據知，三位港姐每人都拍咗一條時長約半分鐘嘅短片，而且主題各有不同，分別係「響往獨立自主」、「勇於追求真愛」同「跳出日常框框」，三條短片會陸續喺翡翠台黃金時間同官方社交平台播出。"

喺1分鐘搶先睇宣傳片入面，着住Casual Wear嘅倪樂琳坐住開篷跑車四圍闖，之後又去到海邊自由自在咁跑大晒飄逸秀髮之餘，仲會「女力士」上身推車，展現女性Carefree又獨立自主一面。至於以少女打扮上陣嘅郭柏妍，就會重施《下流上車族》嘅經典踩滑板絕技勇敢追愛，全程帶住Gfable甜笑同Bling Bling眼向另一半送上「笑哈哈」情侶戒指，襯晒佢嘅Cutie性格。OL打扮現身嘅陳楨怡就以「高冷Tone」出奇不意咁喺辦公室入面「突破領域與時空」忘我打鼓，因為夠破格又有型有款，贏盡同事掌聲。原來陳楨怡本身學過打鼓，所以當日喺拍攝現場好快就上手。

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。