《中年好聲音4》陳旭培母親節爆喊！未聽父母辭職追夢 選《笑忘書》眼濕濕

《中年好聲音4》將於本周日（10日）晚8點翡翠台播映「人生之歌」上半場。今集喺母親節播出，多位選手喺舞台上歌頌親恩，氣氛好感人，亦引爆全場淚腺；三位女評審肥媽、海兒同谷婭溦仲「喊了幾盒紙巾」。

陳旭培未遵父母意願辭職追夢

「靚仔配音員」陳旭培賽前接受訪問時提到，小時候好多重要嘢都由媽媽安排，佢亦好愛母親，會遵從對方決定，但佢坦言當時都會諗：「點解我唔可以決定番自己條路點行呢？」旭培一直熱愛唱歌，但母親唔想佢用前途作賭注。佢雖然明白父母每次決定都係為佢好，但佢真係好想走自己嘅路。

結果去年踏入35歲，旭培最終鼓起勇氣追夢，瞞住父母辭去正職，並參加《中4》。

父母得知後又嬲又擔心，但旭培參賽期間仍有唔少兼職工作，例如舊老闆或親戚會找佢做Freelance。父母見到兒子財政上未有太大問題，先放下心頭大石，亦慢慢支持佢追夢，並喺親友面前經常讚佢唱歌好聽。

選《笑忘書》講和過去 忍唔住淚崩

旭培今次選唱《笑忘書》出戰，就係想用豁達態度去忘記過去，想同過去的自己，以及父母達成和解。佢喺台上投入演繹，全程眼濕濕，唱畢之後都忍唔住落淚。車婉婉表示佢背負包袱參賽，旭培就講包袱嚟自父母，不過佢亦補充父母好愛錫佢，除咗支持佢唱歌，亦會支持佢所有決定。

之後車婉婉話會送禮物俾旭培，大螢幕跟住播放佢同父母的合照，亦播出父母預先錄下的鼓勵錄音。旭培聽完忍唔住淚崩，場面極度感人。之後車婉婉再表示仲有一份禮物送給旭培，再度引爆全場淚腺。

相片來源: 《中年好聲音4》

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。