《唱錢》黃淑蔓挑戰《戀愛預告》緊張到爆驚Pass唔到會毁師門

Release date: 2026-05-08 17:00 | Entertainment News

《唱錢》本周六（日）一集繼續玩明星版，今次接受挑戰嘅係曾兩度拎到金像獎「最佳原創電影歌曲」、入行11年嘅黃淑蔓（Feanna）。Feanna話係自己主動舉手報名參加《唱錢》，因為「反正平時冇嘢做都會唱歌」，所以覺得挑戰《唱錢》System係一個好好嘅練習機會：「好多年冇聽住原唱去唱歌」；佢仲好有火，幾次強調：「我係為咗挑戰Monster先嚟呢個節目架！」

Feanna 5歲已經鍾意唱歌，中一開始就學classical同聲樂。據知今次挑戰仲「破紀錄」咁拎到4次100％拍子準確率，令森美同Eric Kwok都睇到眼都凸，森美讚：「唱歌好穩陣」，Eric Kwok就話：「有女人味。」

根據官方發布新聞稿，Feanna今次挑戰歌單入面其中一首係《戀愛預告》，呢首歌對Feanna特別有意思，因為係佢經理人林珊珊嘅首本名曲，所以Feanna上場前都大嗌「特別緊張」，仲擔心會搞到壞家聲：「Pass唔到咪毁師門？」