《香港探秘地圖》黎耀祥化身市井風水師放笑彈 龔嘉欣爆炸頭黑色魚網Look搶鏡

《香港探秘地圖》以7大香港都市傳說做藍本，下周一（18日）起逢星期一至五晚八點半喺翡翠台播映。除咗單元故事又靈異又有趣，仲帶住濃厚人情味夠晒吸引，視帝黎耀祥（祥哥）同視后龔嘉欣嘅再度合作亦自然成為焦點。

嘉欣同祥哥早喺2020年劇集《殺手》已經有多場埋身肉搏嘅精彩對打，當時祥哥仲點名稱讚嘉欣動作表現出色。今次相隔6年再合作，雖然唔使再打到飛起，但二人照樣有連場「埋身肉搏」場口，因為一碰頭就爭辯不休唇槍舌劍，獲封劇中「鬥氣冤家」。

唔止祥哥同嘉欣喺劇入面擦出無限火花，二人角色設定同樣係必睇賣點。以演小人物見稱、縱橫影視圈40年嘅祥哥，過往最深入民心嘅多數都係小人物或市井之徒，好似《人在邊緣》嘅「曱甴」、 《西遊記》嘅「豬八戒」、 《射鵰英雄傳》嘅周伯通，同電影《生化壽屍》嘅「駒哥」等，小人物代表作多到數唔晒。

今次祥哥相隔接近十年再會觀眾，飾演集無賴、市井、輕佻同小聰明於一身嘅「風水大師」莊一臣，再度放出佢嘅搞笑看家本領，勢必又一次成功入屋。

至於近年憑《新四十二章》嘅「生鬚豬肉嬌」同《靈戲逼人》嘅「花痴女鬼」令唔少觀眾見識到搞笑一面嘅嘉欣，今次會再度喜感大爆發，飾演口才了得加最強大腦嘅「百變打假網紅」畢萍（顧名思義性格不平則鳴）。

為咗配合角色「網紅」人設，嘉欣有時會以比較嘩眾取寵嘅言行同造型登場。根據劇組今日率先發布嘅宣傳劇照，嘉欣其中一個爆炸頭＋黑色魚網Look已經夠晒出位；為咗搞笑效果，嘉欣仲唔惜自毁顏值，以「拍扁式毁容Look」上陣，淨係睇劇照都喜感十足，期待值爆燈。

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。