小豬比《AI時代》做小老師！教幼稚園英文＋Steam火山爆發有板有眼

《AI時代，未來實習生》由麥明詩同Patrick Sir（林溥來）主持，本周六（23日）晚8點於翡翠台播出最後一集；而壓軸「星級家庭」請到陳展鵬同囡囡陳諾瑤（小豬比）。

現年7歲的小豬比，「我的志願」係幼稚園老師。佢一方面想「話事做大家姐」，另一方面就覺得小朋友「好得意同埋好細粒」。小豬比早前拍《爸知弊！你嚟湊吖！》時已以CEO型性格、無厘頭同超豐富表情包走紅；今次再出場《AI時代》，一樣延續無厘頭又多表情的風格，更再次展現佢嘅「CEO型性格」。

教學有條理、觀察力強到連爸爸都震驚

今次小豬比的實戰對象係一班年紀只比佢少一至三歲嘅幼稚園小朋友。佢要做兩樣工作：一係教英文；二係喺Steam課程中帶小朋友體驗「火山爆發」。

節目中，小豬比無論係1對2定係1對8教學，都互動率超高。佢會不斷發問，提升「學生」的主動思考與參與感；亦會時刻關心進度同心理狀態，言談之間仲提供足夠情緒價值。以下係小豬比的精叻老師語錄：「你知唔知？」「你試吖」「你哋好叻呀」「你想坐邊度？」「唔緊要，做到嘅我哋。」結果成功獲得一眾「學生」愛戴，全程聽足指示。

小豬比的貼心、清晰指示同表達能力，令觀察室爸爸陳展鵬、兩位主持麥明詩及Patrick Sir都大為折服。陳展鵬直言：「我個心有啲噗噗跳，好感動。」而一向對小朋友有心得的Patrick Sir亦忍唔住連環讚嘆：「佢講第一句已經好清晰喇喎」「大人都做唔到分分鐘」「好得意，佢識咁樣教嘢喎。」

搞笑又有愛：爸爸欣賞後即被小豬比「刁難」

最搞笑係陳展鵬事後欣賞女兒：「你教兩個小朋友英文時，我覺得好感動。」小豬比隨即做咗個鬼臉，轉頭就刁難爸爸：「咁你喊吖！」令陳展鵬當場哭笑不得。

另外，兩父女的搞笑又有愛互動亦係今集大賣點——尤其小豬比實戰前的「情緒卡片」遊戲實習，陳展鵬需要做各種不同情緒，讓小豬比觀察同競猜。兩父女忍住笑「眉來眼去」，估中後的狂喜表現，加上小豬比的搞笑得戚表情，夠晒盞鬼！

相片來源: 《AI時代，未來實習生》

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。