《唱錢》小肥挑戰首本名曲《寵物》！自爆緊張到擰頭：唱衰就退出樂壇？

《唱錢》明星版新一集將於本周六（30日）晚8點35分於翡翠台播映。今集挑戰歌手係擁有多首大熱歌曲（包括《寵物》、《時光機》、《一首歌》等）嘅小肥（原名徐智勇）。

小肥一向唔論悲情歌定係充滿爆炸力嘅歌，都難不到佢；而《寵物》更係男士喺K房必唱嘅失戀神曲之一。雖然被外界認為係實力唱將，不過小肥出場時反而擰晒頭，直指自己非常緊張，覺得《唱錢》System標準難度好高。

小肥解釋，做歌手就一定要大膽，所以決定喺節目挑戰自己；佢亦表示事前已不停練習，只係自嘲冇記性，只能盡量放鬆。至於自己覺得乜類歌曲相對容易？佢話因為有收睇《唱錢》，見到唔少人挑戰低Level歌曲時都撻Q，所以唔敢輕易諗住「邊首易啲」。

另外，小肥一向唱歌充滿感情；為咗幫家庭觀眾謀福利，佢除咗「勒住」感情演繹之外，仲被Eric Kwok數度取笑「死都唔扭音」，逼到佢即場反擊，仲揚言要打Pat Pat：「你驚啲咩啫？」

根據官方發布新聞稿，小肥今次挑戰歌單其中一首，就係自己嘅首本名曲《寵物》。小肥坦言，每次唱《寵物》都會出現唔同效果，因此有信心之餘亦同時好怕失敗；除咗冇面目見「江東父老」，佢仲學似之前曾上過《唱錢》嘅側田咁，豪言如果「唱衰」首本名曲就要退出樂壇！

想知小肥最後係順利過關，定係引退收場？就要鎖定本周六播映嘅《唱錢》！

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。