《夫妻肺片》馬明怕醜講「掛住」勁肉麻 譚俊彥自爆人工全數交老婆

《夫妻肺片》今晚（3日）播出第三集，迎來新一組「星級戰友」嘉賓。男子組有「住家型人夫」譚俊彥同「冇腦型人夫」馬國明（馬明），女子組就有「放養型人妻」梁諾妍、「遷就型人妻」連詩雅同「管家型人妻」陳敏之。眾人圍繞「最常講的情話」同「婚後理財」兩大主題大談特談，仲爆出兩位視帝級人夫嘅驚人寵妻行為。

馬明尷尬冧豬樣講「掛住」勁肉麻
喺「恩愛實測」環節，眾星大方分享最常講嘅情話，焦點就落喺出名怕醜又天然呆嘅馬明身上。雖然馬明嘅情話得「掛住」兩個字，但由佢用「招牌靦腆」樣講出嚟就特別肉麻，閃到全場即時起哄！另一個特別位係梁諾妍即場打長途電話畀當時身在巴黎嘅洪永城Tony，Tony雖然把聲明顯未瞓醒，但都照樣配合老婆玩「日常情話」競猜遊戲，搞笑之餘亦盡顯寵妻一面。

今集「夫妻互片」環節就探討財政大權話題，而兩位視帝譚俊彥同馬明嘅寵妻程度，絕對可以話係教科書級別！馬明強調自己婚前婚後都「冇乜點使錢」，蕭正楠聞言即爆料，話馬明識老婆湯洛雯之前，無論返工定踢波都只係孭住同一個黑色單邊袋。阿蕭話：「突然間有一日，佢換咗袋喎，跟住我就同老婆（黃翠如）講『馬明一定拍緊拖，呢個袋一定係女朋友送畀佢嘅』。後尾真係畀我知佢拍緊拖。所以佢真係唔使錢喺自己身上架。」

譚俊彥亦加入「爆料戰團」，話曾經親眼見到馬明喺名店用 FaceTime幫湯洛雯「代購」，阿譚仲一邊爆料一邊模仿馬明當時寵妻語氣：「BB你要唔要呢個呀？BB你鍾意我買畀你吖！」被爆到極尷尬嘅馬明，即場拋出被現場女士捧為天花板嘅「人夫語錄」反擊：「老公間唔中送個袋畀老婆，我又覺得好平常。」即刻令全場女士開心到嘩嘩聲，曹永廉都忍唔住代天下男人發聲：「你玩皺人哋啲老公呀！」全程爆笑。

陳敏之自揭打機慘遭老公囝囝輪流埋怨委屈到想喊
另一位「寵妻經典」譚俊彥就自揭，自己所有人工都上繳老婆，自稱除咗一張附屬卡之外乜都冇，仲自爆每個月使費都係靠老婆配畀佢嘅一萬多港元家用：「不過我到依家都未見過張（附屬）卡，亦都唔知個密碼。我老婆個個月畀零用錢我，我得一張八達通。」陳敏之聞言即好奇問：「如果你喺街見到對鞋好鍾意，你點買呀？」譚俊彥嘅答案令吳若希反問佢平時點樣生活，曹永廉就話：「同佢傾偈，我想喊呀！」想知阿譚點答，就記住留意節目。

至於女子組就全員強調 Shopping 會用私己錢，亦都非常支持老公嘅嗜好。陳敏之亦自揭，為咗陪老公同兒子，專登逼自己陪兩父子打機，可惜最後反而慘遭埋怨，一度委屈到想喊。”

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。