《夫妻肺片》求婚篇名場面：陳展鵬紙戒套入手挨笑　蕭正楠求足4次冧到爆炸

《夫妻肺片》今晚（5日）第五集迎來「星級爸媽」嘉賓。男子組有「老錢夫」——陳展鵬（煎Pan）、「天使與魔鬼型人夫」——周志康；女子組則是「二十四孝人妻」雨僑及「依戀兒子型人格阿媽」賴慰玲。

本集兩大主題分別係求婚／被求婚過程，以及佗B時女方與男方的不同視角。節目最抵死嘅位在於：當主持／嘉賓分別以自己角度講出求婚版本後，會安排兩人致電另一半求證——結果先後出現「口供唔夾」及「冧到爆炸」兩種版本。

「口供唔夾」：陳展鵬、單文柔等

「口供唔夾」其中代表人物係陳展鵬及單文柔。陳展鵬自揭自己曾趁單文柔熟睡時，將自己摺的紙戒摺套在對方手上，隨即被吳若希笑指：「你係逼人結婚！」
事後他又再到英國作正式求婚；但兩人致電求證時，單文柔劈頭就講：「你好似冇認真求婚喎」，令陳展鵬只能用笑遮醜：「你唔記得唔好亂嚟，影響我形象喎」。

兩人更出現其他口供不一致位，甚至引起爭拗；最後單文柔一句：「你係咪唔舒服呀，你把聲咁樣嘅，記得飲多啲水喎」成功令全場起哄，亦為對話畫上句號。至於陳展鵬事後笑言：自己口供同老婆有出入，叫佢事後「一額汗」。

「冧到爆炸」：蕭正楠、雨僑老公羅力威

「冧到爆炸」代表則有主持蕭正楠同雨僑老公羅力威（向雨僑求婚）。
蕭正楠自揭自己曾先後在過山車及靚靚教堂求婚，並笑言「過山車求婚」失敗是因為心理壓力太大；而翠如亦曾被他求證時「爆出一句」：「你同我求過咁多次婚，你講邊次呀？」
翠如其後更自爆：「我強逼你同我求婚吖嘛！」此外她再幫阿蕭補充第三次及第四次求婚：原來阿蕭「求足咁多次」全因翠如鍾意嗰種被求婚嘅感覺，寵妻程度幾近瘋狂。

至於羅力威向雨僑的求婚，過程同樣浪漫。雨僑透露當時去到羅力威屋企，發現大門冇鎖、又聽到琴聲及小提琴聲；打開門後見到地上以蠟燭鋪成一條路。沿途最終找到戒指盒及寫着「可唔可以嫁畀我」的字條，兩人最後感動落淚相擁。
不過雨僑亦指出兩大爆點：其一係羅力威「啲字好核突」，其二係羅力威竟然着住睡衣行出嚟。羅力威另一個「估你唔到」位，是原來他親臨錄影廠陪雨僑錄影，直情係「暖男人夫天花板」。

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。