《中年好聲音4》許雲妮「沙膽」唱《愛你》爆冷91分　異軍突起成新威脅

《中年好聲音4》今（7日）晚播映「安歌之夜」上半場，歌單如下：
周志康《一步一生》、陳旭培《我的天 我的歌》、許雲妮《愛你》、許美琪《星河感覺》、卓猷燕《世紀末煙花》、尹景順《半天假》、蔡宓婕《爛泥》。

許雲妮異軍突起成新威脅

許雲妮一開口就以「神級開場」先聲奪人，甚至在無伴奏下仍能發揮到位；佢嘅招牌沙聲扣人心弦。隨住不斷升Key，情緒亦層層遞進，最後將全首歌推到高潮，行雲流水嘅演繹征服全場，最終斬獲91分。

張佳添大讚雲妮唱出自己味道，認為「許雲妮呢3個字已經慢慢成為一股好有威脅性嘅勢力」，對所有參賽者都係一個威脅。許志安亦表示一開始就被歌曲開頭擊中，形容係「屏息靜氣嘅感覺」。

周志康、許美琪、卓猷燕跌入待定區

至於今集最低分嘅三位參賽者——周志康、許美琪、卓猷燕——則跌入待定區。

周志康選唱《一步一生》，雖然獲張佳添讚「中音好靚」，但整首歌嘅層次遞進感略嫌不足；許志安同肥媽亦覺得志康信心不足，直到後半段先唱回應有水準。

許美琪選唱《星河感覺》，真假音轉換雖然非常出色，但許志安直言美琪未能唱出「既開心又帶點淒慘」嘅感覺。海兒認為美琪嘅高音過於用力；張佳添則嫌佢演唱初段有少許「木獨」，未能完全投入歌曲氣氛，反而後半段先開始發揮。

而卓猷燕甫開始唱《世紀末煙花》就已甩Beat，肥媽即刻肉緊為她打拍子。海兒直指猷燕唱歌時過分肉緊且大動作，與《世紀末煙花》格格不入；周國豐亦表示猷燕咬字有問題。

相片來源: 《中年好聲音4》

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。