《細間始終你好》阮兆祥去深水埗買香港特色布料再闖尖沙咀廣東歌復古酒吧

《細間始終你好》第八集入面，主持阮兆祥帶大家去深水埗文青布行，一針一線記錄香港情懷；之後就再闖大坑鐵皮書檔，跟住去到尖沙咀一間主打懷舊港產電影同廣東歌嘅上樓酒吧。

主持阮兆祥今集第一站去到深水埗。深水埗以前係香港製衣業同布料批發嘅心臟地帶；但隨住時代變，唔少傳統老布行都面臨轉型危機。行緊行緊街頭，抬頭就見到一間掛滿五顏六色、又好有文青味嘅Tote Bag店舖，呢個新方向係由盛昌布業第二代接班人Regal開創。

店內保留咗好多香港特色嘅自家製布料，好似有香港山峰圖案嘅「山布」，亦有印滿霓虹招牌圖案嘅特色布料。

盛昌布業嘅轉型，源於疫情期間市民對手作口罩嘅需求。Regal覺得香港都應該有返具本土特色嘅布料，所以由最初幾款設計慢慢發展到而家更全面、多元嘅選擇。

而且Regal仲親自學車縫技術，花咗兩、三年每晚練習，由零開始到熟練操作縫紉機，一針一線親手做出各款原創手工作品。

至於布行成功轉型，盛昌布業第一代老闆李先生由一開始冇咩信心，到而家見到兒子用另一種方式延續老店情懷，將香港人嘅集體回憶變成實物，都覺得十分欣慰。

大坑鐵皮書檔

去到大坑，除了著名舞火龍同打卡熱點，仲藏住一間由鐵皮檔改建而成嘅小書店。鐵皮檔原本係香港最草根嘅傳統街頭風景，但係大坑入面就有咗鐵皮檔變成實體書店，充滿懷舊味道。

覺苑店主李美麒本身有設計背景，同時從事催眠治療同紋身工作，經營呢間街頭書店約四年。呢間鐵皮小書店麻雀雖小，卻五臟俱全，不論身心靈、設計藝術、文學同哲學等各類書籍都有。

講到而家速食文化好盛行，書檔就俾都市人機會翻開泛黃嘅舊書，感受紙張質感，變成鬧市入面可以停低腳步、靜心思考嘅避風港；而且色彩繽紛嘅書檔仲為社區增添生氣。書店亦會唔定期舉辦茶會、詩會同分享會，令街坊同有心人坐低交流，提供一個放低煩憂、同自己對話嘅休閒角落。

尖沙咀二務所（港產電影＋廣東歌）

最後一站去到尖沙咀二務所，呢間係以港產電影同廣東歌為主題嘅雞尾酒酒吧。老闆仲民開設酒吧嘅初衷係想讓都市人開心，搵到放鬆嘅空間。

店內有復古裝潢，參考《花樣年華》年代歌廳風格，入面用了好多木材、黃色暖光同復古玻璃磚；而露台牆上仲有梁朝偉同張曼玉經典交談畫面，視覺效果好有代表性。

酒吧內所有雞尾酒都係用廣東歌命名，並串連成「愛情八部曲」，由相識、摩擦、分開到回憶嘅過程；好似：

《夢中人》- 單戀 荔枝葡萄酒
《陪著你走》- 親近 紅茶冧酒
《為你鍾情》- 投入 西瓜莫吉托
《認真如初》- 承諾 馬利寶酒＋可可酒
《矛盾一生》- 磨擦 油麥菜清酒
《你暪我暪》- 逃避 百香果白酒
《囍帖街》- 分離 粟米片威示忌
《我的回憶不是我的》- 回憶 咖啡朱古力酒

每一杯都有唔同主題、唔同故事；而點《我的回憶不是我的》仲會附送一張即影即有相片，寓意將專屬回憶帶走。

為了貫徹港式文化，酒吧提供嘅佐酒小食竟然係極具地道風味嘅魚蛋同燒賣；配搭廣東歌同港產片，成就咗最純粹嘅香港體驗。

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。