《中年好聲音4》終極7強名單出爐！周志康、陳旭培、鄭仲豪止步爆喊告別　引發淚海

《中年好聲音4》昨（16日）晚播映10強戰最終回「衛蘭之夜」！經過5個回合較量，終極7強名單正式出爐，晉級者分別係尹景順、尤淑情、許美琪、許雲妮、吳亦偉、蔡宓婕以及鄭家聲。而累積排名分位於末三位嘅選手——第8名周志康、第9名陳旭培、以及第10名鄭仲豪——則無緣再前一步，遺憾止步《中4》舞台。

淘汰環節上，周志康情緒大爆發，當場哽咽回憶一開始戴上面具、以「企鵝人」身分參賽嘅初心：「由一開始蒙住我塊面，我唔係邊個，我只係一個鍾意唱歌嘅人。多謝呢個節目，令到我、原來我把聲係可以觸動到人，呢件事我覺得好幸運。」
佢亦感謝戰友一路並肩作戰，更指背後其實承擔咗好多故事，值得大家支持；最後亦希望即使自己離開舞台，7強朋友都可以繼續得到觀眾支持：「因為大家都真係好唔簡單。」

周志康續講：「多謝我太太啦，因為呢段時間佢要照顧家庭，仲要照顧埋我。」又提到自己同阿哥周志文嘅默契，直言兩兄弟其實唔需要多講，心連心就已經足夠。台上台下都哭成一片，場面相當感人。

至於陳旭培亦喊到飛起，表示當晚夜晚瞓覺時，其實都有諗過淘汰感言：「我唔想呢個旅程結束。」佢指自己直到最後一刻先真正感受到不捨，並感謝一起練歌、一齊互相鼓勵嘅同伴：「有好多人話『我哋一齊入決賽』，雖然依家做唔到，我都會好衷心支持你哋。」最後，陳旭培亦特別多謝老婆，並期望自己嘅淚水可以變成之後繼續向前嘅動力：「啟德加油！再次多謝《中年好聲音4》呢個舞台。」

相對之下，「Rock友」鄭仲豪就用較瀟灑嘅方式同大家告別，直言呢次離開對自己反而係一份祝福：「離開呢個比賽。我會有好多寫咗、儲咗嘅歌要出，所以大家唔需要太傷心，後會有期！Thank you。」

相片來源: 《中年好聲音4》

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。