玫瑰戰爭｜馬國明細膩喊功獲讚視帝級水準 難忘昔日拍《On Call》見證楊茜堯神級演技

熱播劇集《玫瑰戰爭》昨晚（12日）播出一集劇情虐心，飾演李德龍的馬國明在接過舊愛關子盈（陳自瑤飾）的遺物後難掩悲痛、當場淚崩，短短一幕盡顯視帝級深情功架！同時，馬國明與昔日經典螢幕情侶楊茜堯相隔12年再度同框對戲，勾起無數劇迷的集體回憶。

劇情講述因關子盈的關係，李德龍與無雙（楊茜堯飾）起初互相敵視、針鋒相對。當無雙將子盈的遺物交還予德龍後，德龍頓時觸景傷情，憶起與舊愛的甜蜜往昔。他凝視著二人的定情公仔，情緒由眼眶泛紅逐步演變成淚流滿面，痛心疾首地獨白：「你知唔知我見佢哋一次，就掛住你一次，我見佢哋多一次，又掛住你多一次。如果當年我有勇氣，勇敢啲留住你，我哋依家已經可以好似佢哋咁，有仔有女。」

隨後德龍滿懷愧疚地痛哭自責：「係我冇用呀子盈！」並將公仔緊緊擁入懷中，畫面極具感染力。雖然場口篇幅不長，但馬國明將角色情深專一、悔恨交加的內心戲演繹得淋漓盡致，細膩哭戲獲網民激讚「不愧係視帝」。

此外，今次亦是馬國明與舊拍檔楊茜堯相隔12年後再度合作拍劇。過往二人多次合演深情愛侶，今次卻破天荒化身處處作對的歡喜冤家，為觀眾帶來耳目一新的新鮮感。

談及與楊茜堯再度攜手，馬國明受訪時坦言相當高興：「我哋隔咗咁多年再合作，個默契依然喺度，不過大家睇劇本冇以前咁表面，依家深入咗好多，大家嘅演技又進步咗。」他更對拍檔讚不絕口，重提當年合作《On Call》的經典求婚戲碼：「佢做戲愈嚟愈穩，更加有層次。同埋佢不嬲都好勁，我記得以前拍《On Call》有場求婚戲，當我講完一段感動嘅對白，佢一攬埋嚟滴淚就即刻落，佢不嬲都係咁準，依家依然保持水準，所以能夠繼續同佢拍戲好開心，希望嚟緊再有機會，因為呢啲咁有默契、咁耐冇拍嘅對手，係會有新嘅火花出嚟。」

至於楊茜堯亦笑言與馬明默契不減當年，更爆笑透露在片場經常忍不住質問對方：「我成日問佢：『點解你喺戲入面唔鍾意我嘅？』因為啲觀眾話點解我哋唔係做一對。我同佢以前演情侶較多，今次反而係冤家路窄同埋敵對嘅場面多，感覺幾得意。」她又表示二人現時心態更趨成熟，對情感處理更為細膩，各自都能獨當一面撐起角色。

相片來源：TVB《玫瑰戰爭》截圖

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。