Your shopping cart is empty
熱播中的《玫瑰戰爭》,昨晚(18日)一集講述無雙(楊茜堯飾)與德龍(馬國明飾)因寶兒(陳星妤飾)偷偷留港一事爆發激烈爭吵,二人再度針鋒相對。加上寶兒當場落淚,希望無雙給予自己一年時間追夢發展演藝事業,令不少觀眾看得相當投入。
劇情講述無雙得悉寶兒仍然留在香港後,立即怒氣沖沖趕到德龍家中算帳。她一見到寶兒便連番質問:「點解喺香港唔去醫院睇吓我?你知唔知我出事呀?你唔擔心我呢個阿姨嘅咩?你唔緊張我㗎?你有無良心㗎?」隨後見到德龍現身,無雙更怒不可遏,當場狠罵對方「你呢條賤龍」,並直斥:「寶兒做得你個女,你咁都落到手!」
面對無雙的連番指控,德龍極力解釋自己與寶兒之間並無男女之情,但無雙怒火中燒,完全聽不入耳。二人互不相讓,連德龍亦忍不住反擊:「我終於明白你係冇變過,我每日叫寶兒同你解釋,我明點解佢唔想同你講嘢喇!」
眼見二人為自己爭執不休,寶兒激動落淚說:「我留喺呢度係因為我真係好鍾意做戲,不如你畀一年時間我,如果我咩都做唔出,我跟你返英國。你畀我自己做決定,會仆會跌我都唔會後悔㗎!」聽到寶兒真情流露,原本怒氣沖沖的無雙頓時眼眶泛紅,一臉心痛地望着對方。當寶兒上前緊緊抱着她時,無雙憶起當年答應好友關子盈會好好照顧其女兒的承諾,淚水隨即緩緩滑落,場面相當感人。
楊茜堯在短短一場戲中展現出豐富的情緒層次,面對馬國明及陳星妤時,從眼神到微表情變化都細膩到位,盡顯視后級演技。場口播出後亦獲大批觀眾留言大讚:「茜堯啲演技真係好出色」、「睇到眼濕濕」、「每個細節都有戲」。
馬國明早前接受 tvb.com 獨家訪問時,亦大讚楊茜堯的「淚功」:「我記得以前拍《On Call》有場求婚戲,當我講完一段感動對白,佢一攬埋嚟滴淚就即刻落,佢不嬲都係咁準,依家依然保持呢個水準。」
除了稱讚拍檔楊茜堯外,馬國明亦對劇中新人陳星妤讚賞有加。他坦言陳星妤雖然資歷尚淺,但勝在有自己的想法,因此拍攝期間,他與楊茜堯亦經常從旁提點:「佢真係好新,我同茜堯真係要幫佢。不過好多新人只係死記對白,冇乜點諗其他嘢。但星妤就有好多諗法,哪怕係錯,但起碼你有個諗法呢個動機係啱,絕對係好事。我好欣賞呢一點,唔係只係帶住張白紙嚟開工。」
馬國明續指,陳星妤排戲時會先演給他們看,再由他與楊茜堯幫忙篩選及調整:「我哋會話畀佢聽點解呢啲諗法唔啱,幫助佢慢慢建立角色。」
對於這位後輩的發展,馬國明亦相當看好:「我覺得佢外形幾好,只要繼續磨練演技,未來應該會愈嚟愈多機會。」
馬國明又憶述自己剛入行時,同樣獲得不少前輩無私提攜,因此希望將經驗傳承下去:「只要我哋感覺到你係真心想學,我哋一定會幫你,所以對住我哋呢啲有啲年資嘅演員,真係唔使驚。」


圖片來源:TVB《玫瑰戰爭》截圖
按此下載 TVBAnywhere+ APP,英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃,或者立即註冊收看免費內容。