娱乐新闻｜TVB 一连两晚盆菜宴热闹登场！主席许涛宣布加薪，全场欢声雷动｜TVB职艺员新春盆菜宴｜许涛

一年一度嘅TVB职艺员新春盆菜宴一连两晚举行，大家一齐品尝丰富嘅鲍鱼盆菜贺新春，不过最令全体职艺员鼓舞嘅，一定系行政主席许涛宣布将会加人工嘅好消息。主席讲到：「2024年肯定系唔容易嘅一年，无论外围经济环境，或者媒体娱乐行业，都有好多挑战，但系我可以好负责任咁同大家讲，喺过去一年，我地好成功咁面对呢啲挑战，TVB嘅业务无论财务上，或者节目上，都有好大嘅认同，所以大家应该为过去一年得到咁好嘅成果而骄傲。」并宣布实时为全体职员加人工，现场即刻欢声雷动。 万千星辉颁奖典礼嘅入围艺人，年年都把握咁齐人嘅机会拉票，第一日已经有唔少视帝视后候选人现身，包括谭俊彦、陈豪、张振朗、林夏薇、张曦雯、姚子羚等，振朗为咗帮《反黑英雄》拉票，仲大胆承诺要派福利，就系公开子羚嘅水着相。 而入围飞跃进步男艺员嘅陈浚霆，出动埋道具拉票，仲有一大班《爱回家之开心速递》嘅演员助阵，三太樊亦敏仲夸下海口话如果风少攞奖，就会同二太苏恩磁一齐着三点式，吓得二太即刻耍手兼拧头。 上届视帝陈豪今年再度凭《企业强人》入围视帝十强，不过都未到颁奖礼，大家已经不停恭喜阿Mo，原来系佢太太陈茵媺传出疑似再度有喜，不过阿Mo就不停笑住否认传闻。 盆菜宴上中声唱将轮番上台献唱助兴，曾志伟兴之所至，盆菜菜宴结束后拉大队带艺人去到《J Music》录像厂继续欢唱，林夏薇仲同志伟合唱《你最珍贵》。