廖慧仪从十字韧带撕裂到跑步夺奖 分享复健之路感触良多

向来热爱运动嘅廖慧仪，近年爱上跑步，最近佢喺社交平台分享多张跑步相，原来成功完成慈善5K跑，仲攞埋奖牌，实在劲！

今次比赛对廖慧仪嚟讲别具意义，因为佢曾经历十字韧带撕裂，从完全唔识跑步，到依家变成跑步迷，过程绝不简单。

佢回忆三年前受伤嘅经历：「当时因为工作学踩滑板，点知一个急停唔小心仆咗落地，『Park』一声，即刻扭伤右脚膝头，痛到大嗌… 真系痛到入心!!!!! 之后即刻坐轮椅上白车入急症室，照完X-ray发现骨头无断，心谂好彩。但再去私家医院照MRI，报告话系十字韧带第三级撕裂（完全撕裂），虽然未至于完全断裂，但已经好严重。」

虽然唔使做手术，但复原过程极为漫长，甚至影响工作：「当时拎住两支拐杖，行路极慢，成日出门都要带住一堆检查报告同医生证明，四围去医院、诊所复诊，做物理治疗，睇晒中医、西医、骨科，能做嘅都试晒，但都只能够慢慢等好。原定工作都换人，之后两个月工作亦被迫煞停。」

最严重嘅一次旧患复发，就发生喺去年去新西兰拍摄《港女野人2》：「冰川登顶之后，唔止伤员膝头痛，连好嗰只都跟住痛，痛到顶唔住，要靠Panadol顶硬上，完成回程5小时落base camp，再落山完成玩命式21日拍摄。拍完之后，成个人跛住上机返香港，真系顶硬上！」

由受伤到依家已经三年多，今年，佢由完全唔识跑步变成跑步迷：「仲跑埋人生第一场5K比赛，仲攞埋奖，结果仲要傻更更唔知，搞到无上台攞奖，拎完参赛证就走咗。」

佢续说：「最近为咗练跑，召集朋友一齐组队跑街，依家谂返起真系好神奇。一开始我超却步，一嚟跑步好闷，二嚟旧患容易复发，5K都痛到顶唔顺。之后决心准时食Supplement、保护关节、做负重训练、Pilates，一星期操两日跑、俾自己充足休息，结果真系无再痛，超感动！好想多谢所有陪我跑步嘅人，wohooo！一齐加油！」