张家辉亲证相隔廿年再拍剧 伙胡杏儿与前TVB幕后回归视坛

张家辉亲证相隔廿年再拍剧 伙胡杏儿与前TVB幕后回归视坛

由 张家辉 主演、内地演而优则导嘅 马浴柯 所执导嘅内地电影，早前成为暑假档期黑马，喺内地票房劲收超过4亿人民币。最近电影嚟香港上映，呢日家辉同导演现身香港嘅首映礼，继11年前喺《扫毒》合作演出，年前家辉参演马浴柯首部执导长片《怒潮》而成为老友，呢次家辉再度演出马导嘅作品，两人同系演而优则导，对动作场面嘅要求亦相当合拍，为求效果大家都唔锡身愿意亲自上阵。

而呢日家辉亦亲证一个震憾嘅消息，就系佢相隔廿年再拍剧，将伙拍视后胡杏儿、内地演员曾舜晞合作演出《刍狗之血》，翻拍外国嘅刑侦题材剧集。家辉话俾故事吸引出山演出，同时亦因为受到TVB昔日嘅幕后拍档诚意邀请：「旧拍档欧冠英同导演苏万聪最近同投资方买咗一个外国IP，有唔同地区都买咗嚟重拍，如果故事唔好唔会吸引咁多人买重制版权，加上我咁多冇拍剧，应该几有新鲜感。」

2004年家辉同欧冠英仲有苏万聪合作剧集《天涯侠医》，亦系佢最后一部喺TVB担正演出嘅作品。 家辉亦视呢次系一大挑战，仲觉得自己好似奥运火炬手一样，接棒重拍责任重大，对于拍档胡杏儿，家辉暂时未同对方联络，要等到开镜时先正式见面。

至于由家辉自导自演嘅电影《赎梦》虽然经已去咗唔同嘅外国影展参展，但系尚未有正式上映时间，作为好友嘅马浴柯爆已率先欣赏电影，大赞家辉执导功力。

#张家辉 #重生 #马浴柯 #20年后出山拍剧 #票房黑马 #胡杏儿 #影帝回归视坛