虚拟情人｜结局周必睇位速报！郭柏妍惊喜客串 Adam面临大危机？

《虚拟情人》，本周一至周五晚八点半喺翡翠台播出最后五集。来到结局周，程晴（王敏奕饰）同Adam（朱敏瀚饰）嘅「完美爱情」将面临超大危机。首先，Neo意外得知Adam已经走入现实世界呢个惊人真相，加上Neo辛苦建立嘅公司面临被告同埋财困等一堆危机，令一向理智嘅Neo最终崩溃「大暴走」，除咗对公司员工发难，更一度尝试破坏Adam嘅「虚空间」，令Adam面临前所未有嘅重大危机…

另一方面，一直住喺Adam心里嘅阿Bug，亦出现不稳定情况，「飞出飞入」相当可疑，不过身体日渐虚弱嘅Adam却未有将实情告诉程晴，仍然勉强自己使用「虚拟力量」帮助程晴…

除了Adam同程晴嘅关系出现危机，结局周中程晴与好友小雨（谭嘉仪饰）之间嘅闺密情、小雨同大明（邓智坚饰）表面平稳嘅夫妻关系、Neo同程晴形同虚设嘅情侣关系都全线爆煲；其中一幕程晴与小雨嘅吵架场口，更突显「平凡女人」同「女神」做闺密嘅痛苦与不甘，小雨喺场口中吐出嘅每句对白都有血有肉，令人心痛，包括：「啱嘅，我呢啲咁嘅人，我真系应该平平凡凡、简简单单咁过架啦，你一直都系咁谂架啦！」、「你梗系听唔明啦，你呢啲天之骄女，有冇企喺我角度谂嘢架咩？」至于敏奕则全程一脸无奈高呼「我以为…」、「我以为…」，当中含泪委屈样真系令人心疼，相信播出时定会引起不少女性共鸣。

结局周另一焦点，第四度同框拍剧嘅朱仔同黄子恒，二人嘅合作顺序同关系为：《机场特警》战友、《拳王》好友、《痞子无间道》伙伴、《虚拟情人》情敌，喺结局周将复刻《拳王》经典打拳场面，暴走嘅子恒更加会火力全开向朱仔穷追猛打，万勿错过。

另外，首周请来陈豪客串演出李文信医生一角为剧集增色不少，结局周同样有惊喜客串，佢就系女神级艺人郭柏妍（Rosita）。据知Rosita同监制玮澄因合作《白色强人2》结缘，因为两人颇为投缘，玮澄就诚邀Rosita客串佢嘅处男监制剧，Rosita亦爽快答应。据闻，Rosita喺剧中饰演妙龄侍应，并会同邓智坚有最多对手戏，想知届时会唔会玩《下流上车族》crossover？紧密留意结局周嘅《虚拟情人》。

点击这里下载 TVBAnywhere+ 应用程式，马来西亚丶新加坡和其他海外观众一个 App 就能看到 TVB 最新电视剧、经典港剧、综艺娱乐和娱乐资讯。网页版同样可以在线观看。点击这里查看服务计划，或者马上注册观看免费内容。