巾帼枭雄之悬崖｜程浩骏入行7年演超过30次古惑仔 曾心灰萌退出念头 因监制一个电话重燃演艺火

《巾帼枭雄之悬崖》（下简称《巾帼４》）中不少绿叶演员表现出色，其中饰演恶霸曹大虎的程浩骏（Hellston）更获得不少网民同情！最初出场时，曹大虎先后因垂涎宁俐（陈桢怡饰）及桂花香（陈晓华饰）美色弄致满城风雨，加上郁啲讲打讲杀、横行霸道，不少网民都指他面目可憎。

但随着剧情发展，网民开始发现曹大虎并非想象中咁衰格，原来宁俐所受的一切伤害及委屈都是她「自制」出来搏取韦豪（罗天宇饰）同情，曹大虎只是被借来过桥的「工具人」。而正当曹大虎准备洗心革面之际，宁俐竟又再度借他过桥兼以美色利诱他；而对宁俐动了真情的大虎，全程受宠若惊、难以抑制心中爱慕情感的同时、又深怕接近宁俐会令自己再度陷入困境，「爱与痛的边缘」的挣扎赢尽网民同情，并封他为「最惨情恶霸兵」，曹大虎这个「悲情角色」一下子火热起来！

开头睇，大家都以为曹大虎系衰人，但其实佢系一个可怜人。

相信不少人对于饰演曹大虎的程浩骏觉得熟口熟面，由于身形庞大、加上唔笑时样子确实有点凶狠，Hellston自2017年加入无线后，饰演过的古惑仔及江湖中人角色不计其数，他接受tvb.com专访时，坦言非正式统计演过至少30次恶人，包括「任何年代的古惑仔、黑社会及手下」，并笑言因为热爱演戏，所以「咩角色都唔会推」。

谈到演了多年恶人，最终凭恶人赢取关注，Hellston笑言能够被观众留意，是很大的快乐，并感谢《巾帼4》监制嘟嘟：「佢会留意到我就算只系手下甲、乙、丙，打手ABC，都真系有心做，同埋佢会谂吓有咩角色啱我做。无论《降魔的》、《爱上我的衰神》及《巾帼4》，嘟嘟都畀我尝试咗啲我未做过嘅角色，其实曹大虎唔系净系虾虾霸霸，佢都算系几悲情嘅人物。」之前嘟嘟受访时，曾大赞Hellston很有演员天份，很懂得发问对塑造角色有用的问题，对此Hellson笑言：「其实无论我问几多问题都好，嘟嘟都好有耐心咁去答我，从来唔Hea我，真系会同我分析，教我点样去演，令我演时更有信心。」

其实除了演恶霸，Hellston近年还加入了「奬老」行列，但原来都是因为嘟嘟，因为在《爱上我的衰神》中饰演饮食KOL「忌廉宾」演得出色，Hellston获曾志伟赏识加入《开心无敌奖门人》做「奖老」。而嘟嘟及《巾帼4》，亦令一度对演艺事业心灰意冷的Hellston重燃斗志及希望：「其实喺接拍《巾帼4》前，我系真心有谂过离开呢行，因为嗰时极度低潮、迷惘，入不敷支啦，见唔到自己喺呢行嘅未来，有谂过不如算数，出去求其搵份万零、两万蚊嘅工、以后安安定定就算，但嗰刻我都仲系好钟意演戏。」

「但嘟嘟一个电话打嚟，我就决定唔走住，拍埋先走，嗰个半月我拍得好开心，无论同演员或幕后嘅相处，都令我重燃番嗰团火。我觉得其实我唔辛苦都辛苦咗咁多年，讲真六、七年啫，有啲人捱咗几十年都系咁，不如我继续啦。呢个角色令我知道我仲有好多嘢未达到、未追求到，我好想继续去做，我谂如无意外我呢世都唔会转行，可能我会喺出面继续搵住其他工、炒吓散，唔使拍剧时我会搬屋，去搵啲出日薪嘅工作去维持住个生活，然后继续去追梦。我唔想辜负自己曾经读过呢科（Hellston毕业于香港浸会大学电影学院表演系）、努力咗咁多年、同埋所有赏识我嘅人，咁好啦，我就继续撑落去啦，或者好快见到曙光哩。」Hellston亦坦言不介意边做演员边送外卖或搬屋：「我冇乜包袱，况且都系等人开门就咁递畀个客，冇人会认得，加上我又唔系偷呃拐骗，只系努力搵钱开饭。」

Hellston确实一直有努力积谷防饥，除了炒散，还跟朋友合资开设制作公司，之前还跟教育界合作，推出协助老师们准备北上交流的网上行程，利用VR技术减轻老师和学生的功夫，不时执到正一正出入学校倾生意。除了搵钱叻，Hellston私下还是足球健将，更曾于阿仙球足球学校教踢波：「我都踢咗十几廿年波，中学时踢过半职业、乙组联赛，亦曾经喺阿仙奴足球学校教过波、做过教练，但入咗行之后冇乜时间再去教，踢波变咗业余同兴趣。」