巾帼枭雄之悬崖｜罗天宇晒完美线条背后乌龙百出 亲揭地狱式甩水过程：24小时冇饮水

罗天宇今晚一集狱中的剥衫演出亦相当震撼眼球，虽然相关晒肌场口只有不足半分钟，但除了结实的胸肌令人眼前一亮，天宇练至条理分明的背肌亦相当抢焦。天宇受访时透露了拍摄场口搞笑事，事缘他接到剧本得悉要晒肌后，早于埋位前三个月已努力Keep线条练大仔，岂料拍摄当日不但撞正低温，负责的导演竟没有叫他剥衫的意思，令天宇一度以为连月来的努力要白费：「去到拍嗰日都差不多尾声，仲觉得自己准备咗咁耐，拍完可以尽情食嘢兴致勃勃咁。我记得嗰日超冻，零度以下左右，我拎住剧本导演时，佢话：『唔使除啦』，我就：『吓？但呢度写住赤裸上身喎，我为咗呢个三角形准备咗唔少时间喎。』因为我拍之前七日度已开始甩水，即系头几日饮好多公升水，三到六公升水，跟住慢慢cut，cut到最后一日24小时唔饮水。我跟住话我24小时冇饮水，可唔可以都拍一拍？佢就话：『你除啦』。」

岂料搞笑事不止一浪，当天宇以为「晒肌」使命完成后在片场大开食界之际，导演竟说要补拍大头，令他再度晴天霹雳：「我以为搞掂，就丧食嘢同饮水，点知导演话要补番入门口嘅Shot，我就：『吓？头先唔系拍咗咩？』但我已经肥晒，身体已经吸咗好多水，啲线条都冇咁靓。呢件事就系教训我，未拍完一场戏都唔可以松懈，随时都要补拍番啲镜头。」天宇续指为了操肌，除日食至少8只鸡蛋补充蛋白质外，连零食也是鸡胸肉、蛋白面包及蛋白能量棒；至于操肌，则要争取时间在酒店房间进行：「拍剧忙冇乜时间健身，所以就买咗大量健身器材同哑铃喺酒店房度一有时间就操。」