郭锋专访｜郭锋亡妻离世7年仍后悔留憾大叹世界变灰色：想快啲同太太再见

发布日期: 2024-11-25 | 娱乐热话

世界上最残忍的事是看着自己深爱的人走先一步，那种无力伤痛，只有经历过的人才会明白，因为你爱得深才会痛得更深，而郭锋绝对深切感受过，全因在2017年其太太欧阳佩珊不敌癌魔离世，从此天人永隔，与太太相爱相知40载，难怪令锋哥伤心欲绝更自觉当时整个世界变成灰色，只望早日与太太再见，能下世再续前缘！

欧阳佩珊转眼离世7年，即使时间能磨灭伤痛，惟在锋哥心中太太永远烙印在其脑海，他接受TVB.com 专访自揭对太太有遗憾，至今仍耿耿于怀，「我听到个心好酸，真系对不起老婆。」

入行半个世纪，在观众心中公认好戏之人的郭锋，相隔7年再现幕前，在台庆剧《黑色月光》中演有钱人「卓昊天」，剧中角色老奸巨滑，浑身是戏的锋哥，看得大家拍案叫绝！

锋哥在剧中展现炉火纯青的演技，令整套剧集张力更为提升，对于他再度回归拍剧，他直言原来由监制关文深亲自出击邀请：「我同佢本身系羽毛球波友，有一日佢突然搵我，我都觉得奇怪，打完之后就问我有冇兴趣嚟TVB拍剧，之后我哋了解咗剧本，觉得角色几好玩，加上我对演戏方面仲好有浓厚嘅兴趣，虽然依家我半退休状态，但有咁嘅机会就一拍即合。」

由于他当年在《创世纪》演「霍景良」一角令人印象深刻，今次「卓昊天」同为反派，一样奸到出汁，难怪令观众指「霍景良」再现，惟锋哥表示只是观众对这个形象太深入民心，所以才会有这样的感觉，惟自言每次拍新的角色必定会摆脱旧有的影子，「今次角色完全唔同，因为霍景良个角色比较直接，你话佢奸唔系奸，只系喺商场上做生意嘅手段，而呢个角色系几得意，佢有反复未被观众睇清点解佢会咁做，令观众会有追看性。」

剧中他与林夏薇与杨茜尧不乏对手戏，锋哥大赞二人也是很有想法肯听肯做的演员，前者更是首次认识合作，故在试造型时，他特意留下与薇薇聊天沟通，了解对方是怎样的演员，「同一个新对手沟通系好重要，加上之后有咁多场口唔知佢点样发挥呢个戏，不过认识咗后觉得几好，个心定好多，觉得佢可以帮到我，因为一套剧只系你自己去做冇意思，亦会令整个戏嘅演出有缺憾，所以成功嘅戏系讲求团队合作。」

今次拍摄期间，锋哥不幸中了流感说不到话，以致很多场口都需要配音，令其觉得美中不足，相当遗憾，「初头佢哋系完全听唔到我讲咩，因为我连对白都唔系好讲到，自己都好忟，好想讲到对白畀对手听，咁对手做戏先可以有反应，都搞咗7至8日，我先开到声听到我讲咩，依家听落好好笑，但当时我真系觉得唔好意思。」

因此，他透露有差不多8成也要配音：「自己都尽量追番嗰个声线，其实睇番都觉得麻麻地，听起嚟有啲有气，有啲又冇气，所以系差紧啲。」

由1972年参加第一期训练班而入行的锋哥，从影50多年，演过无数经典角色，在外界眼中他已达「教科书级演技」，惟他从不自满，力臻完美，故对其而言没有一个角色为最好，「自己睇番都系觉得不足，即使我有好多角色都做过，但点样令到个角色去到另一个境界，所以创造角色系好重要。」

在幕前锋哥屡演反派严肃古板，内里实质铁汉柔情，对太太欧阳佩珊极为深情，即使对方已离世7年，惟他对其的思念从不减退。

二人因拍剧认识，并在剧集《无语问苍天》不知不觉埋下爱情的种子，继而在1977年结婚决定携手到老，两夫妻多年来鹣鲽情深，同甘共苦，走过40年婚姻路，奈何2017年欧阳佩珊因病离世，令锋哥伤心欲绝，更因而淡出幕前。

回想当时突然失去一生中最重要的人，锋哥直言整个世界也变成灰色，做任何事也再没有意思，「我前面嘅画面系做咩都一样，直情觉得咩都无所谓，嗰种无所谓系想快啲同太太再见，所以嗰时要我出番嚟工作绝对冇可能，你叫我欢笑系笑得到，但唔系个戏嘅角色，而有时剧情可能仲会触发我某啲唔好嘅情绪，变咗自己唔受控或者整个人沉咗落去，只会影响大家。」

时间流逝，现时锋哥在伤痛慢慢走出来，感谢其身边的朋友陪伴左右，不令他胡思乱想，「当自己一个静落嚟唔谂系冇可能，初时自己一个人都好沉重，依家因为时间耐咗会开怀咗。」

即使太太不再在身边，锋哥依然记挂对方，不但每星期也会到坟场探望，每天回到家仍然会与对方「聊天」，「『老婆我返嚟喇』、『老婆我依家出去喇』，有啲人可能会觉得好傻，甚至系咪精神失常呀？我话唔系，呢个对我系一个习惯，好似刷牙洗面一样，只不过喺生活入面做番比较接近以前嘅事。」

而且，他的手机背面一直放着太太的相片，全因对方是其「定海神针」。

他自言个性火爆冲动，相反太太冷静理性，二人一凹一凸互补不足，「我见到张相就会个心舒服好多同时警剔自己做每一样嘢都要小心，因为我几百厌，成日都做得『过晒龙』，以前太太喺度嘅时候好多时都会话我，『你做咩啫？』、『你咁急做咩？」总之要坐定慢慢谂，办法总比问题多，所以依家佢唔喺度，要识得提点自己。」锋哥说。

与太太携手走过人生不同阶段，锋哥回望过去自揭对太太有遗憾，有一件事至今仍令其耿耿于怀，由于他一直以来热爱运动，包括潜水、爬山、打波和跑步等，年轻时更爱玩赛车，喜欢那种刺激感。

「呢件事已经系80年代嘅事，嗰时我参加咗赛车比赛，我冇同太太讲，后尾出赛佢先知，当时佢系唔开心，点解依家先话佢知。后尾佢身边嘅同事朋友同我讲，『你去咗比赛时佢要开工拍嘢，佢坐喺化妆间个样揦埋口面，原来好担心我嘅安全。』那刻我听到心好酸，真系对不起老婆，同埋我喺度嘅时候佢完全冇展露唔开心嘅情绪，咁先攞命。」锋哥说。