戴祖仪首踏舞台剧舞台 陈晓华周嘉洛蒋祖曼现身撑场 送「灵芝树」搞到佢笑爆嘴？

 《正义女神》一班演员戏入面同戏外都好老友，日前戴祖仪（Joey）挑战人生第一次演舞台剧，仲有剧中拍档周嘉洛、蒋祖曼同好友陈晓华到场力撑。佢哋除咗亲身嚟打气，仲特登谂桥送咗一棵「灵芝树」做贺礼，戴祖仪又惊喜又忍唔住笑爆嘴，睇得出大家私底下真系老友鬼鬼。

受访时，周嘉洛话呢个主意出自「家姐」蒋祖曼，佢仲同蒋祖曼一齐讲笑，话觉得呢棵灵芝树同戴祖仪好衬，寓意「长寿、尊贵、年年有今日」。蒋祖曼之后就正经补多句，解释点解真系要送灵芝树：「嗰阵拍《正义女神》时，我同Joey同房，当时Joey喺房入面就种咗盆植物，所以一见到盆灵芝树，就决定一定要送畀Joey。」

第一次企上舞台剧舞台嘅戴祖仪，要喺一个半钟嘅独脚戏入面又跳又唱，表现真系令人眼前一亮。蒋祖曼事后亦喺社交平台大赞：「好叻女呀 Joey！」面对前辈嘅肯定，加上好友送上嘅「重磅」贺礼，戴祖仪就鬼马回复：「Love u guys soo much~~我会好好养育嗰棵灵芝😂」。

合照入面，大家围住棵灵芝大摆搞怪 Pose，成个画面又搞笑又温馨，网民都纷纷留言：「呢份贺礼真系够晒补」、「正义女神剧组感情真系好」、「Joey 演独脚戏咁犀利？」

相片来源: TVB娛樂新聞台& IG@jomanchiang

点击这里下载 TVBAnywhere+ 应用程式，马来西亚丶新加坡和其他海外观众一个 App 就能看到 TVB 最新电视剧、经典港剧、综艺娱乐和娱乐资讯。网页版同样可以在线观看。点击这里查看服务计划，或者马上注册观看免费内容。