《唱钱》小肥挑战首本名曲《宠物》！自爆紧张到拧头：唱衰就退出乐坛？

《唱钱》明星版新一集将于本周六（30日）晚8点35分于翡翠台播映。今集挑战歌手系拥有多首大热歌曲（包括《宠物》、《时光机》、《一首歌》等）嘅小肥（原名徐智勇）。

小肥一向唔论悲情歌定系充满爆炸力嘅歌，都难不到佢；而《宠物》更系男士喺K房必唱嘅失恋神曲之一。虽然被外界认为系实力唱将，不过小肥出场时反而拧晒头，直指自己非常紧张，觉得《唱钱》System标准难度好高。

小肥解释，做歌手就一定要大胆，所以决定喺节目挑战自己；佢亦表示事前已不停练习，只系自嘲冇记性，只能尽量放松。至于自己觉得乜类歌曲相对容易？佢话因为有收睇《唱钱》，见到唔少人挑战低Level歌曲时都挞Q，所以唔敢轻易谂住「边首易啲」。

另外，小肥一向唱歌充满感情；为咗帮家庭观众谋福利，佢除咗「勒住」感情演绎之外，仲被Eric Kwok数度取笑「死都唔扭音」，逼到佢即场反击，仲扬言要打Pat Pat：「你惊啲咩啫？」

根据官方发布新闻稿，小肥今次挑战歌单其中一首，就系自己嘅首本名曲《宠物》。小肥坦言，每次唱《宠物》都会出现唔同效果，因此有信心之余亦同时好怕失败；除咗冇面目见「江东父老」，佢仲学似之前曾上过《唱钱》嘅侧田咁，豪言如果「唱衰」首本名曲就要退出乐坛！

想知小肥最后系顺利过关，定系引退收场？就要锁定本周六播映嘅《唱钱》！

点击这里下载 TVBAnywhere+ 应用程式，马来西亚丶新加坡和其他海外观众一个 App 就能看到 TVB 最新电视剧、经典港剧、综艺娱乐和娱乐资讯。网页版同样可以在线观看。点击这里查看服务计划，或者马上注册观看免费内容。