《夫妻肺片》马明怕丑讲「挂住」劲肉麻 谭俊彦自爆人工全数交老婆

《夫妻肺片》今晚（3日）播出第三集，迎来新一组「星级战友」嘉宾。男子组有「住家型人夫」谭俊彦同「冇脑型人夫」马国明（马明），女子组就有「放养型人妻」梁诺妍、「迁就型人妻」连诗雅同「管家型人妻」陈敏之。众人围绕「最常讲的情话」同「婚后理财」两大主题大谈特谈，仲爆出两位视帝级人夫嘅惊人宠妻行为。

马明尴尬冧猪样讲「挂住」劲肉麻
喺「恩爱实测」环节，众星大方分享最常讲嘅情话，焦点就落喺出名怕丑又天然呆嘅马明身上。虽然马明嘅情话得「挂住」两个字，但由佢用「招牌腼腆」样讲出嚟就特别肉麻，闪到全场实时起哄！另一个特别位系梁诺妍即场打长途电话畀当时身在巴黎嘅洪永城Tony，Tony虽然把声明显未瞓醒，但都照样配合老婆玩「日常情话」竞猜游戏，搞笑之余亦尽显宠妻一面。

今集「夫妻互片」环节就探讨财政大权话题，而两位视帝谭俊彦同马明嘅宠妻程度，绝对可以话系教科书级别！马明强调自己婚前婚后都「冇乜点使钱」，萧正楠闻言即爆料，话马明识老婆汤洛雯之前，无论返工定踢波都只系孭住同一个黑色单边袋。阿萧话：「突然间有一日，佢换咗袋喎，跟住我就同老婆（黄翠如）讲『马明一定拍紧拖，呢个袋一定系女朋友送畀佢嘅』。后尾真系畀我知佢拍紧拖。所以佢真系唔使钱喺自己身上架。」

谭俊彦亦加入「爆料战团」，话曾经亲眼见到马明喺名店用 FaceTime帮汤洛雯「代购」，阿谭仲一边爆料一边模仿马明当时宠妻语气：「BB你要唔要呢个呀？BB你钟意我买畀你吖！」被爆到极尴尬嘅马明，即场抛出被现场女士捧为天花板嘅「人夫语录」反击：「老公间唔中送个袋畀老婆，我又觉得好平常。」即刻令全场女士开心到哗哗声，曹永廉都忍唔住代天下男人发声：「你玩皱人哋啲老公呀！」全程爆笑。

陈敏之自揭打机惨遭老公囝囝轮流埋怨委屈到想喊
另一位「宠妻经典」谭俊彦就自揭，自己所有人工都上缴老婆，自称除咗一张附属卡之外乜都冇，仲自爆每个月使费都系靠老婆配畀佢嘅一万多港元家用：「不过我到依家都未见过张（附属）卡，亦都唔知个密码。我老婆个个月畀零用钱我，我得一张八达通。」陈敏之闻言即好奇问：「如果你喺街见到对鞋好钟意，你点买呀？」谭俊彦嘅答案令吴若希反问佢平时点样生活，曹永廉就话：「同佢倾偈，我想喊呀！」想知阿谭点答，就记住留意节目。

至于女子组就全员强调 Shopping 会用私己钱，亦都非常支持老公嘅嗜好。陈敏之亦自揭，为咗陪老公同儿子，专登逼自己陪两父子打机，可惜最后反而惨遭埋怨，一度委屈到想喊。”

点击这里下载 TVBAnywhere+ 应用程式，马来西亚丶新加坡和其他海外观众一个 App 就能看到 TVB 最新电视剧、经典港剧、综艺娱乐和娱乐资讯。网页版同样可以在线观看。点击这里查看服务计划，或者马上注册观看免费内容。