《细间始终你好》阮兆祥去深水埗买香港特色布料再闯尖沙咀广东歌复古酒吧

《细间始终你好》第八集入面，主持阮兆祥带大家去深水埗文青布行，一针一线记录香港情怀；之后就再闯大坑铁皮书档，跟住去到尖沙咀一间主打怀旧港产电影同广东歌嘅上楼酒吧。

主持阮兆祥今集第一站去到深水埗。深水埗以前系香港制衣业同布料批发嘅心脏地带；但随住时代变，唔少传统老布行都面临转型危机。行紧行紧街头，抬头就见到一间挂满五颜六色、又好有文青味嘅Tote Bag店铺，呢个新方向系由盛昌布业第二代接班人Regal开创。

店内保留咗好多香港特色嘅自家制布料，好似有香港山峰图案嘅「山布」，亦有印满霓虹招牌图案嘅特色布料。

盛昌布业嘅转型，源于疫情期间市民对手作口罩嘅需求。Regal觉得香港都应该有返具本土特色嘅布料，所以由最初几款设计慢慢发展到而家更全面、多元嘅选择。

而且Regal仲亲自学车缝技术，花咗两、三年每晚练习，由零开始到熟练操作缝纫机，一针一线亲手做出各款原创手工作品。

至于布行成功转型，盛昌布业第一代老板李先生由一开始冇咩信心，到而家见到儿子用另一种方式延续老店情怀，将香港人嘅集体回忆变成实物，都觉得十分欣慰。

大坑铁皮书档

去到大坑，除了著名舞火龙同打卡热点，仲藏住一间由铁皮档改建而成嘅小书店。铁皮档原本系香港最草根嘅传统街头风景，但系大坑入面就有咗铁皮文件变成实体书店，充满怀旧味道。

觉苑店主李美麒本身有设计背景，同时从事催眠治疗同纹身工作，经营呢间街头书店约四年。呢间铁皮小书店麻雀虽小，却五脏俱全，不论身心灵、设计艺术、文学同哲学等各类书籍都有。

讲到而家快餐文化好盛行，书档就俾都市人机会翻开泛黄嘅旧书，感受纸张质感，变成闹市入面可以停低脚步、静心思考嘅避风港；而且色彩缤纷嘅书档仲为小区增添生气。书店亦会唔定期举办茶会、诗会同分享会，令街坊同有心人坐低交流，提供一个放低烦忧、同自己对话嘅休闲角落。

尖沙咀二务所（港产电影＋广东歌）

最后一站去到尖沙咀二务所，呢间系以港产电影同广东歌为主题嘅鸡尾酒酒吧。老板仲民开设酒吧嘅初衷系想让都市人开心，搵到放松嘅空间。

店内有复古装潢，参考《花样年华》年代歌厅风格，入面用了好多木材、黄色暖光同复古玻璃砖；而露台墙上仲有梁朝伟同张曼玉经典交谈画面，视觉效果好有代表性。

酒吧内所有鸡尾酒都系用广东歌命名，并串连成「爱情八部曲」，由相识、摩擦、分开到回忆嘅过程；好似：

《梦中人》- 单恋 荔枝葡萄酒
《陪着你走》- 亲近 红茶冧酒
《为你钟情》- 投入 西瓜莫吉托
《认真如初》- 承诺 马里宝酒＋可可酒
《矛盾一生》- 磨擦 油麦菜清酒
《你暪我暪》- 逃避 百香果白酒
《囍帖街》- 分离 粟米片威示忌
《我的回忆不是我的》- 回忆 咖啡朱古力酒

每一杯都有唔同主题、唔同故事；而点《我的回忆不是我的》仲会附送一张即影即有相片，寓意将专属回忆带走。

为了贯彻港式文化，酒吧提供嘅佐酒小食竟然系极具地道风味嘅鱼蛋同烧卖；配搭广东歌同港产片，成就咗最纯粹嘅香港体验。

点击这里下载 TVBAnywhere+ 应用程式，马来西亚丶新加坡和其他海外观众一个 App 就能看到 TVB 最新电视剧、经典港剧、综艺娱乐和娱乐资讯。网页版同样可以在线观看。点击这里查看服务计划，或者马上注册观看免费内容。