異空感應｜阮浩棕悲慘童年楊子漮大起底！媽咪爆阿仔一聽劇本即爆喊 曾演出《婚後事》及不止一套熱播電影

《異空感應》由於劇情發展出人意表，加上角色性格鮮明，及疑似Big Boss的Duncan（阮浩棕飾）經歷夠晒慘情兼入肉，故連日來均在網絡引發熱討，連帶一些新面孔，亦吸引了一定程度的關注。

其實Duncan之所以癲出新高度，全因有個極悲慘的童年，不但遭親生父親邢有山（陳嘉輝飾）拋棄，親生母親莊玉玲（劉嘉琪／呂珊分飾）亦完全缺乏身為人母應有的擔帶，及後更因迷戀情場騙子阿星（姚宏遠／胡渭康分飾）對年幼的Duncan多番嫌棄，令小Duncan要忍受孤獨的同時，亦經常活在被打或被罵的惶恐之中，洗版式贏得網民同情。

Duncan爆紅，連帶飾演Duncan的小演員亦備受關注！原來飾演小Duncan的小演員名為楊子漮，現在已經是小學3年級學生的他，4歲開始入行拍攝廣告，及後於5歲時獲得機會面試無綫劇集《婚後事》，並獲錄取成為王敏奕及羅天宇的乖仔！除了《婚後事》，楊子漮在近期熱播電影《破‧地獄》及《爸爸》中亦分別飾演了韋羅莎甄茵的兒子及劉青雲兒子的童年版。

對於囝囝備受關注，楊媽媽接受tvb.com訪問時感謝大家支持及鼓勵，並透露子漮（桃桃）接到《異空感應》劇本時，亦因同情小Duncan喊不停：「好多人話Duncan童年好慘，呢個都係桃桃收到劇本嘅反應，嗰時佢得小一，我讀劇本畀佢聽先，佢聽完已經由心度喊出嚟，話呢個小朋友好慘。所以係拍嗰陣啲喊戲，佢係真心又好自然咁喊到出嚟。」楊媽媽笑指囝囝對於可在拍劇期間攞正牌鬧媽咪大感過癮，令她哭笑不得：「因為佢知道平時當然唔可以咁講嘢。」

雖然有分身參與拍攝工作，但桃桃完全沒有荒廢學業，還獲得學校獎學金獎勵，真叻仔:「我同桃桃講，如果佢鍾意拍攝，條件係要應付好學業，咁先可以去拍攝。所以佢好識分配時間，喺學校會利用小息／午膳時間去完成功課，然後放咗學就去拍攝。」楊媽媽續指除了拍攝，桃桃還熱愛踢足球、唱歌及彈結他：「佢踢足球嗰度依家係校隊同區隊成員，而佢學結他係因為佢都好鍾意唱歌，佢話彈住結他唱歌好有feel，另外仲有上catwalk班。總括嚟講，佢係一個表演欲好強嘅小朋友，好喜歡同人交流傾偈，份人比較成熟，有時等埋位聽佢同d演員嘅對話都幾搞笑，好似佢會問人：『點解你會做呢行？你覺得需要咩性格先適合呢行呢？』完全唔似一個小三嘅小朋友會問嘅嘢。」