奔跑吧！勇敢的女人們｜「御用壞人」唐嘉麟轉演喜劇晒Rapper功架 性格正面演足13年壞人唔覺悶

無綫劇集《奔跑吧！勇敢的女人們》中，不少side cast均使盡渾身解數搞Gag搞氣氛，其中飾演茄輪的KT唐嘉麟，無論是「戒指錯摸」場口，或是「跑馬評述」上身、一口氣無間斷地抑揚頓挫講出長達45秒的對白，均令人印象深刻，加上傻更更周不時表錯情又純情，角色討好。

談到「馬評」場口，KT接受TVB.COM訪問時坦言只是根據劇本要求去做，並花上一天左右功夫熟讀對白及練習語氣，結果順利在冇乜NG下完成拍攝。問到Rapper出身的KT，有否將rap的技巧加進場口，他笑言：「都係少少啫，主要係編審寫得好。」他又感激蕭正楠在戒指場口給予不少寶貴意見：「主要係睇吓點樣幫我個角色睇落去會再蠢啲。」談到在場口中被蕭正楠噴麵噴到成手都係，KT笑言並不介意：「講真，拍咗咁耐劇，有咩污糟嘢未試過，呢個好小事，同埋阿蕭咁靚仔，真係冇乜所謂，哈哈。」

已加入無綫第十三個年頭的KT，早年多飾演小混混、流氓、二世祖或渣男角色，是無綫「御用壞人」，期間曾憑《十八年後的終極告白》的變態殺人保安、及《迷網》中的「COIN公子」等引起關注。直到《痞子殿下》，KT轉型將喜劇元素加入奸角生涯，憑蠢鈍壞蛋「朱標」突圍。不過KT的真正「洗底」之路在2024年年底才正式開啟，他在上一檔劇集《異空感應》中飾演撞板多過食飯、兼且口沒遮檔的論盡警察「神經刀」，當時已吸獲不少網民關注及支持，感嘆KT終於不用再做壞人！

談到壞人Image深入民心，KT坦言豪不介意：「我的確係成日做壞人同成日畀人打，但我係真係唔介意做壞人嘅，一來壞人我幾乎係由細演到大，所以對我嚟講可能易啲揣摩，而且壞人都有分好多種，所以唔怕演起上嚟冇新鮮感。」他續指無論是甚麼角色，他都會努力做好，皆因機會可以隨時殺到或是溜走：「做呢行心臟要好強大，因為今日唔知聽日事。同埋拍劇係一個好好玩嘅teamwork嚟，有時大家度吓嘢、撞到啲火花出嚟係好開心嘅！」

近年專注拍劇的KT，其實暗地裏一直未忘初心、繼續努力追逐說唱夢。當年因打籃球認識歐陽靖、並以其徒弟身份出道當Rapper的KT，6年前除成為《愛‧回家之開⼼速遞》⼤四喜的《乜嘢叫做IG我哋唔知》幕後協製功臣而廣受廣注外，數年前又與廣州新生代主流說唱人HomeBoy葉楓華推出說唱歌曲《朝九晚五》，還曾獲邀出演《中國有嘻哈》第二季。對於Rapper路，KT坦言仍然未放棄：「我相信有好多人已經忘記咗我係識Rap嘅，所以嚟緊我決定會出返嚟Rap，同拍劇一齊雙棲發展。」