胡定欣圓夢開個人音樂會唱足20首歌 多次感觸落淚：自己好鍾意唱歌，但一直冇做好

視后胡定欣在本月12日在佛山舉行第一次個人專場《胡定欣LIVE CIRCLE巡迴音樂會佛山站》個唱，650張門票秒速售罄，定欣又驚又喜，多次在台上感謝650位觀眾真金白銀支持她的第一次，亦感謝自己一直沒有放棄唱歌，終於可以圓夢。

今次專場定欣特意命名為《Live Circle》，對她而言別具意義：「《Live Circle》有人生嘅意思，其實人生就像一個圓形，人生中有好多事情發生，但其實係一個循環，圓形係唔會有一個終點，一個結束，佢一路係軌道上面，就以我唱歌嚟講，雖然我當初入行係想成為歌手，緣份令我成為演員，但係我鍾意唱歌呢樣嘢從冇離開過我嘅生命，我依然好鍾意唱歌，直至呢刻我可以舉辦到我個人專場畀大家。」

定欣更邀得在事業上有重要位置的「亂世情侶」祥哥做嘉賓，皆因二人曾有8次的合作，大家亦師亦友的關係，當他們合唱《巾幗梟雄之懸崖》的插曲《紅蝴蝶》，令全場粉絲大呼「柴十七」同「七爺」。

以新秀歌唱比賽入行的定欣，雖然最終成為演員，她一直沒有放棄過唱歌，今次能圓夢舉辦了這場個人騷，她接受TVB.COM直認興奮期待：「我想開騷嘅心情準備咗一輩子，過去呢一年都一直有意思去辦個人專場， 但中間又要安排好多嘢，希望係一個最好嘅時候做。」

她指在過去4年無間斷學唱歌，全因很想自己技巧有進步：「因為以前真係太忙，唔可以成日都去練習 ，所以變相個效果唔係咁理想，而呢4年不停咁練， 自己真係見到個效果有改變 ，老師亦幫助咗我好多， 絕對係加強咗我嘅信心去開呢個騷。」又表示很想將自己學習到的技巧，在這個騷運用到出來。

在音樂會上，定欣多次感觸落淚，她自言全因這段時間真的用了很多心機練習：「我喺個騷講唱歌係一直自己好鍾意嘅嘢，但自己一直冇將佢做好。今次經過時間用心練習， 當然我唔可以話係完美做得好好，但我覺得呢個都係過程， 我會繼續去學同練習 ，所以絕對係好多感受。」

她在台上唱足兩小時，獻唱20首歌曲，對於其而言每首歌都有難度：「好似自己首歌《無悔無愧》，一向都避免揀，但同時因為係自己隻歌，又夠氣勢，我覺得更加應該要去面對，練到唔驚。」

當中她提到鄭秀文的《我們都是這樣長大的》和李幸倪的《 很堅強》最令其難忘：「呢首係我跟老師上堂學嘅第一首歌，所以呢首歌已經係用咗4年時間去練，由最初好緊張，變到依家好享受去唱，因為我覺得真係好好聽同埋歌詞好有意思；至於《 很堅強》係大膽嘅嘗試，本身我鍾意呢首歌，私下會成日聽同試唱，但冇諗過會公開唱，因為難度好高，但最後都想趁呢個騷可以嘗試一下。」

定欣又指舉辦這個騷盼在場的粉絲或現場觀眾能感受到其的用心和誠意：「 因為你花過心機去練， 你就會知道你嘅能力比以前多， 以前我絕對冇把握喺台上唱兩個小時20首歌， 但呢個係一個好開始同埋嗰晚嘅騷令我獲益良多，自己都好期待下一站，希望可以繼續做自己喜歡嘅事同下一站嘅觀眾分享。」