富貴千團｜傅嘉莉超貼身造型大晒完美葫蘆身形 360度零贅肉加結實背肌超吸睛

《富貴千團》除了兩大詐騙集團OPM及Smart Cap的鬥智鬥力、鬥心計鬥財技夠晒吸引，兩大女主角湯洛雯及傅嘉莉的造型及拼搏演出亦為劇集一再增添亮點。先說在上月《萬千星輝頒獎典禮》中勇奪最佳女配角殊榮的傅嘉莉（Kelly飾），Kelly在劇中飾演擅於操控人心（PUA）的Smart Cap中堅份子Irene，不但口才一流，身形與顏值同樣一絕。單以Kelly的出場戰衣來說，超貼身的剪裁將其美好身形展露無遺，堪稱360度零贅肉、零死角；至於另一套低胸波點公主袖戰衣，單從正面看已夠晒女人味，加上背部的修身剪裁及大露背綁帶設計，再次突顯Kelly超完美線條；而觀乎Kelly的數款露背裝，其背肌線條操得相當完美，尤其中間清晰結實的坑位，更是要付出不少努力才能操到的效果。

Kelly笑言呢場戲，收咪好難收，成日穿崩。

Kelly接受TVB.COM訪問時，笑言近日劇集出街後，監製亦忍不住大讚她拍攝期間身形甚弗：「監製最近都message我講咗三次，『你嗰陣真係好弗呀』，我都有因為咁即刻回顧番（套劇）。其實諗番起個拍攝真係心驚膽跳，其實出場嗰條裙，最大挑戰除咗係keep弗，仲有係收咪，因為支咪真係唔知點擺好。因為我哋用無線咪，即係主機能一條線有個咪頭咁，個主機真係好難收。而我出場嗰條裙，無論個主機擺喺邊都係會穿崩嘅，前後左右都唔得之餘，擺喺大髀中間又條裙太短喎，嗰時真係諗盡辦法。最後我要每拍完一個鏡頭，就要換一換個主機嘅位置，即係拍我back shot，我就擺番個主機喺前面，仲要每一次都要入廁所整，好攰呀！」

Kelly續指由於試造型時已知道所有衣服都相當蝦人著，故此拍攝前不無壓力，還因而開啟了做運動及節食keep弗模式：「本身個造型係需要（著到咁）嘅，因為我係Smart cap入面唯一嘅女性，同埋要係吸睛啲嘅，變相啲造型要誘人啲。以前做model時我都有baby fat，嗰時已經有套keep弗方法入咗血。第一係梗係要控制飲食啦，盡量多菜多肉少碳水，但唔食又唔得，通常我會擺飯做第一餐，其餘時間真係食得好清淡，主要係菜呀魚肉呀少少海鮮同雞蛋。我本身係可以食得好清淡嘅，麥皮我可以食水煮，烚菜同清蒸海鮮我都好鍾意嘅，我反而唔係好鍾意食有汁嘅嘢。因為呢個飲食已經習以為常，所以冇覺得好辛苦。」做運動方面，Kelly則最愛跑街：「我覺得最快減肥方法係有氧運動，最舒服係跑街，但要body靚係真係要游水嘅，依家都有做吓家居運動。同埋我都會焗桑拿同浸腳，keep住個血液循環快啲個效果亦會顯現啲。」