痞子無間道｜首集三大彩蛋：粉紅Panda外賣仔造型勁搶！車婉婉角色名「辛媛潔」惹熱議

昨晚播出的《痞子無間道》，彩蛋位源源不絕，「大豁湖」、「《金裝四大包子》、《火舞黃瓜》、《大時代購》、《孫悟空三打排骨精》等細微心思位令有網民開心到笑出聲外，還有三大重點彩蛋值得留意。
 

重點彩蛋（一）Shocking Panda外賣仔 夠現代味兼造型夠晒搶的「快腳熊貓」外賣仔李紹堅，一身粉紅色似曾相識的外賣裝束，喚起不少網民日常回憶，大呼抵死。

重點彩蛋（二）：別具心思角色名 車婉婉角色「辛媛潔」就咁聽相當奇怪，不少網民好奇背後含意，直到有網民指婉婉的角色平時會被稱呼「潔姨」時，謎底終獲解開，大讚編劇有心思。另杜燕歌率領的捕快團隊，除了麥美恩的團隊整隊都是惡搞現代球星名、及有「魏忠（偽忠）」等諷刺味濃的名字出現外，核心捕快的名字加起來竟然拼出「齊楚燕秦趙魏韓」，又一個心思位。
 

重點彩蛋（三）：經典古惑仔角色晒冷拱照「陳形」 為了起番個適合行走江湖的朵，費仁（周嘉洛飾）在湖邊費盡心思，先後講出一大堆火爆烏鴉大飛山雞浩南𡃁坤巢皮喇叭等經典電影角色名，玩玩吓更玩到圓形、梯形甚至陳形，令網民直指「笑出聲」。

網民的話：

「好少劇集第一集已經咁好笑」

「本來我要趕飛機都睇埋先走」

「後生人做主角我最鍾意」

「難得有個古裝劇，還是無厘頭搞笑古裝劇」

「無厘頭得嚟又多梗」

「上一套好似無咁癲」

「古代劇場，現代故事」

「即係《搞乜鬼奪命雜作》」

「搞笑得嚟又有劇情，好睇」

「咁快做完一集，證明好好睇」

「在古代見到現代廣告，覺得幾得意」