痞子無間道｜黃子恆跳出官仔骨骨奸角框框首演「反智壞蛋」 拍劇資歷25年僅演過三次喜劇

隨著劇情發展，《痞子無間道》由主角到配角的人物性格及故事背景亦愈見突出，昨晚一集驚揭了泰帥（黃子恆飾）與思朗（麥美恩飾）原來是已和離的夫妻，泰帥表面與思朗狗咬狗骨，實際卻是愛前妻心切兼想救思朗離開「爆血館」…

近年先後在《隱形戰隊》、《反黑英雄》及《黑色月光》中因演奸角令觀眾留下印象的子恆，這次雖在《痞子》冧莊演「奸角」，但其實純粹只是一味自稱「我係咪好奸呢」，加上智商有限、撞板多過食飯，放個炸彈都論論盡盡，又喜歡以不切實際的「連坐法」懲罰自己手下以為可以恐嚇敵方，反智之餘零殺傷力，對演開官仔骨骨心計奸角的子恆來說絕對是一大突破。

甚少演喜劇的子恆，是次釋放出來的喜劇節奏亦令網民眼前一亮，繼大前晚（本周一）與周嘉洛「唇槍舌劍」式玩轉香港經典影視臥底角色，昨晚一集又與嘉洛大玩Beatbox，兩人爆肚自創「痞子版《香港早晨》」，有趣之餘與嘉洛仔亦擦出不少火花，難怪網民好評不絕：「黃子恆真係好好笑，完全唔係平時官仔骨骨嘅形象」、「希望畀多啲機會子恆，佢做戲真係好好，正經又得、搞笑又得」、「平時淨（多數）做黑社會奸角cool爆，今次九唔搭八得幾好。」2000年開始拍劇的子恆，接受TVB.COM訪問時透露入行以來拍過三部喜劇，且無獨有偶三部都是古裝：「第一套我都唔係好記得，好似係《大冬瓜》，演一個騎呢家丁、冇乜對白，第二套係賀歲劇《黃金萬両》，呢套《痞子》可以話係『進階瘋狂』版喜劇，都係一個難得嘅挑戰。」

一年有八成時間演奸角 被指「奸角入血」的子恆，坦言每年有七至八成時間都是演奸角，故很感激監製Andy願意冒險起用他演喜劇：「都希望畀觀眾睇到黃子恆唔係淨係可以著西裝、斯斯文文咁去演戲，佢都可以另類嘅。其實套劇我自己睇番都會笑，因為當時演得都幾隨心，有時都唔記得咗當時點解會咁演。」子恆續指拍劇從來沒有刻意為角色設計小動作或記憶點，主要都是百分百代入角色思維去演繹所有場口：「我覺得范泰帥份人主要係唔守規矩、估佢唔到，想做乜就做乜，自High同活喺自己世界，變相我點演都得，只要導演同對手收貨。」

親揭眼線時粗時幼之謎 每日上妝頭至少花費兩個小時 談到有網民笑指泰帥條眼線時粗時幼，子恆笑言是為了符合角色人設：「佢化妝有時粗有時幼先符合番佢跳框嘅性格嘛。」談到泰帥造型及髮型均相當誇張，子恆坦言每次造型都至少要花兩個多小時，相當費時，並指單是落眼線妝也並不容易：「因為要用啲唔甩色嘅眼線膏先上到妝。其實我個髮型係頭套嚟，笠上去都幾重，又要攝好多頂夾，類似啲女仔拍宮廷劇咁。最近宣傳我上番呢個妝頭，我都想像唔到當時大熱天時拍劇時咁大動作係點過，不過見到出嚟效果好咩都值得。」