李芷晴自認少女心對愛情有憧憬 透露過往拍拖經歷曾令對方有壓力

李芷晴（Stephanie）近日參加TVB全新戀愛綜藝真人騷《女神配對計劃》（暫名），她自稱已單身5個月，希望能遇上比她高及有才華的男生，但不會着急去找。

對於今次參加這個戀綜節目，Stephanie接受TVB.com訪問直言一直以來也喜歡看不同國家的戀綜，亦有幻想過自己有否機會能夠參加：「我本身都係比較浪漫型同好講直覺嘅女仔，好似今次呢個計劃，當製作組接觸我嘅時候，我又正正單身，唔知點解覺得有一種好似命中注定要參與嘅感覺，所以就決定參加。」

Stephanie自認少女心，對愛情十分有憧憬：「我好追求嗰種心動嘅感覺，加上我對愛情呢個議題一直都非常有興趣，好鍾意同唔同人討論對愛情嘅睇法，所以身邊嘅朋友都會覺得我係戀愛腦。」

她又直言每次拍拖也十分投入，會將對方放在重要的位置，望大家能互相支持和依賴對方，但正正如此亦同時令身邊人有感壓力：「因為我嘅Love Language係Quality Time同Physical Touch，所以我會期待同對方有多啲見面相處同接觸溝通嘅時間，但係可能咁樣亦會令到對方有壓力。」

談到作為女神的她，理應追求者眾，要奪得其芳心也不是容易的事，對此Stephanie說：「我又覺得冇話難唔難追，因為我實在太講求感覺，當我好鍾意一個人嘅時候，佢甚至乎可能唔需要做任何嘢去追求我，我都會願意同佢一齊。」

她續說最重要是感受到對方的真誠：「當然我都要感受到對方真係在乎自己，願意為你付出幾多，證明到自己喺對方心目中有幾重要嘅指標。」