痞子無間道｜六合彩女神羅雪妍初試啼聲獲讚「痞子好聲音」 因為一隻狗獲監製睇中？

《痞子無間道》每集都勁多大場面加群戲，演員夠多之餘，亦個個都勁有發揮空間。

近日，便有四名《痞子無間道》演員的演出受到關注，第一位是有「六合彩女神」之稱的羅雪妍（Uki），2020年透過參選港姐入行的Uki，自2021年開始參演劇集，先後憑《愛．回家之開心速遞》中接龍小花Gigi一角、及《六合彩》主持工作成功入屋。今次是Uki繼《本尊就位》後第二次演出古裝劇《痞子無間道》，除了古典造型獲讚有氣質、被指撞樣「美魔女」康華外，Uki在第四集及第十集中獻唱的《淺醉一生》，總Solo時間長達2分半鐘，獲得了不少關注及好評，網民大讚她宜古宜今之餘，又大讚她擁有天生一把靚聲，因而獲封「痞子好聲音」。網民留言：「係咪真係你唱架」、「可以參加中年好聲音」、「耳朵懷孕」、「求Full Version」。

對於唱歌獲好評，Uki受訪時坦言受寵若驚，並坦言其實入行並沒有自己擅長唱歌，但由於入行後要為任何表演作最好準備，所以開始密密唱K秘密練聲，無綫小花葉蒨文（Sophie）便是Uki其中一個K腳和飯腳。Uki續指由於自己是《痞子殿下》Fans，故得悉監製Andy有意開拍第二季時，即想爭取機會一齊玩，Uki說：「後尾知道咗Andy想搵人唱歌，我就膽粗粗自薦，之後佢叫我錄音畀佢聽，點知就好好彩畀佢揀中咗。」Uki透露由於《淺醉一生》不少高音位，故對唱歌外行的她來說頗有難度，為此她事前做了不少準備功夫：「我搵咗鄭世豪上堂，佢教我點去唱番好啲高音，同埋喺正式錄音前都有不斷反覆咁練習。其實錄音時我都幾緊張，因為唔係我擅長嘅事，依家首歌拍出嚟靚到好MV咁，我好開心，感恩所有台前幕後嘅努力。」
 

據知，Andy之所以大膽起用歌唱外行Uki在劇中Solo一小段歌曲，除了覺得她試音時歌聲及唱功合格外，亦看中了對方的專業精神，Andy：「嗰時我搵佢拍《寵物Pet Pet》，佢係做陳庭欣嘅助手，要成日幫佢抱住隻中型狗狗，都好重吓嘅。但佢好乖嘅，就算個鏡頭唔係影緊佢，佢都會盡忠職守抱住隻狗，有時我見佢抱到明明手都震晒都仲係死頂咁抱住，呢件事令我好記得呢位演員，覺得有機會一定要畀多啲演出機會佢。」對於Andy細心留意到自己，Uki得悉後大為感動：「你哋唔講番我聽我真係唔知，好開心Andy竟然留意到，好多謝佢畀我呢個機會，完全冇諗過可以喺電視度唱歌。」