今晚乜都拗｜麥玲玲瘋狂啄住林盛斌：你額頭鑿住出軌兩個字 阿Bob反眼反擊：你擔心吓你自己先啦！

昨晚一集《今晚乜都拗》爭辯程度激烈，麥玲玲忽然「Mean精」上身、吓吓啄住阿Bob，令阿Bob一度嬲到衝往「敵方陣營」爭論。事緣玲玲師傅先是長篇大論定義何為精神出軌：「我哋講緊會上頭嘅精神出軌，例如玩玩吓手機會笑吓好開心嘅，會擾亂生活節奏嘅；肉體出軌其實今時今日喺普遍嘅男性係好簡單架啫（邊說邊向阿Bob手指指）。肉體出軌可以冇愛，精神出軌一定有愛情，最終精神連肉體一齊走埋嘅，所以女人揀係要兩害取其輕。」說畢即針對阿Bob謂：「好似阿Bob成日都肚餓架，佢肚餓你唔畀佢食嘢咩？佢咪暈咯，係咪吖？」起初阿Bob仍氣定神閒回應：「我依家唔出聲住，等陣你就知死！」豈料玲玲未有收手，再下一城踩多阿Bob一腳：「所以你額頭鑿住出軌兩個字！」之後又向著阿Bob手指指意有所指謂：「依家啲男人肉體出軌好快冇架喇，差唔多年紀架喇。」此言一出，原本哈哈大笑的阿Bob，即嬲到彈起身衝向玲玲師傅正式宣戰：「指夠喇！你唔好再指喇！」之後不忘搞笑拋出一句：「我依家即刻出軌！」去到第二回合論到阿Bob一方發言時，阿Bob即急不及待反擊玲玲師傅：「你好擔心我有冇肉體上面出軌吖嘛？你擔心吓你自己先啦！你成日唔喺香港，又撈嘢又盛，你老公得自己喺屋企咋。」

除了玲玲師傅及阿Bob，昨晚曾展望及近日憑《痞子無間道》成功入屋的Honey都有驚人Bite，認為精神出軌較難的曾展望說：「反正每段關係走到最後，對大家身體都冇乜求知慾架喇。」森美聞言大表贊同：「你講出咗好多結咗婚好耐男人嘅心態。」至於Honey更大膽表示支持另一半將肉體外判，並以外國新興概念為例子：「肉體出軌我哋應該學習去接受，其實現代社會大家都同意另一半兼顧太多角色，不如外判番少少出去，外判咗個肉體關係出去。」森美聞言大為興奮表示：「我好想贊成佢，但我驚我太太睇到。」