痞子無間道｜周嘉洛40呎「過江龍」飛越錄影廠大叫好爽 親揭吊完威也「紅都面晒」之謎

昨晚一集《痞子無間道》，劇情講述費仁（周嘉洛飾）、符玲（陳瀅飾）、公子（朱敏瀚飾）及泰帥（黃子恆飾）四人前往找就公理論，希望可以取消符玲的「拔劍之約」，因而激嬲就公引發連場激戰…原本節節敗退、被打至「撻生魚」的費仁，最終拔出寶劍將就公刺斃…

周嘉洛/陳瀅/朱敏瀚/王灝兒 尋找失聯間諜 昨晚長達8分多鐘的打鬥戲相當精彩，嘉洛除經歷了「人肉呼拉圈」、「破牆而出」、「巴黎鐵塔反轉再反轉」外，還經歷了在近十年劇集上甚少出現的「過江龍」吊威也！相關約15秒的「橫飛」場口，講述就公一掌將費仁由婚宴大堂的一個盡頭打飛去另一個盡頭，距離足足有成個廠咁長，即約40呎左右！根據無綫官網事後曝光的幕後花絮，嘉洛仔完成第一次「過江龍」後「紅都面晒」；第二次「過江龍」尾聲，被Bang埋牆的嘉洛更引發巨響，令現場工作人員亦極為慌張。雖然過程望落辛苦，但嘉洛兩次完成「過江龍」後返回原點時，均表現出非一般活力，不是大擺chok甫，就是「扮電兔」，精力充沛。嘉洛仔接受TVB.COM訪問時笑言：「我本身都鍾意吊威也嘅，覺得刺激，雖然我塊面事後紅晒，但呢個係基因嘅問題，我塊面好易紅，再者其實冇乜離心力，所以好爽，如果再夠瞓少少去吊呢個過江龍，我覺得直頭係好似入咗主題樂園玩機動遊戲咁。」

除了武鬥，昨晚費仁和就哥還有舞鬥，嘉洛仔謙稱自己只是亂跳：「嗰啲片段其實係亂跳嘅，我本身都唔叻跳舞，如果大家細心留意嘅話，應該會發現我有笑場，希望出嚟效果係配合番個氣氛啦。」嘉洛仔又爆料指袁雨就「舞替」真身是超強舞者：「佢啲動作真係好好睇，大家可以讚吓佢。」