痞子無間道｜李君妍從演15年首度反串 所有動作戲均親身上陣　曾因過份投入角色唔敢入女廁

昨晚（26日）劇情有兩大重點，第一個重點是公子（朱敏瀚飾）忽然自爆是「被遺忘的細作」，令費仁（周嘉洛飾）出盡板斧試探虛實企圖相認；同一時間，公子身邊突然出現了一名經常「情深款款」的男子阿七（李君妍飾），令阿強（JW飾）懷疑該人正是公子心上人小新（神秘男子）…

向來是網民最愛的李君妍，從演15年原來是首度扮男生，君妍接受TVB.COM訪問時，笑言由於造型與真身出入太大，一度驚到唔敢入女廁，相當誇張：「我同監製Andy合作多次，佢真係每次都有唔同嘅挑戰畀我。今次都真係幾爆，因為係第一次扮演男仔嘅角色，之前對造型都有無限幻想同期待，最後出嚟嘅效果好彩都有人讚靚仔，算係carry到。我收到消息要演阿七後，都留意多咗身邊男同事嘅動靜，同埋講對白都有故意壓低把聲。喺拍攝期間，因為太投入角色，我有時都會當咗自己係男人，黐咗撇鬍鬚，差啲連女廁都唔敢入，同女同事傾計都怕醜。」君妍又笑言拍古裝扮演男生最大的福利，是可節省不少梳化時間：「女仔平時拍古裝梳化整頭至少兩個鐘，依家可以享受到做男仔嘅福利，都幾爽幾方便。」

談到角色前晚蒙面與袁雨就大打出手一幕，君妍透露全是親身上陣，並感激監製Andy一路以來一而再給予機會、支持及信任：「從《鐵馬戰車》、《平安谷之詭谷傳說》到《拳王》、《寵愛Pet Pet》再到《痞子殿下》，每次有動作場面Andy都會諗到我。今次所有動作都係親身上陣，等我可以延續喺《功夫新星》時學到嘅嘢。呢個角色因為係做男仔要束胸，所以郁動起上嚟都方便，打起上嚟就更加得心應手。」

君妍雖然是現時無綫出名好打的女藝人，但其實她都是加入TVB後才真正接觸武術，2011年君妍透過參加《功夫新星》接觸武術，並先後李嘉及楊盼盼習武，修習南拳、詠春和泰拳。