廖慧儀從十字韌帶撕裂到跑步奪獎 分享復健之路感觸良多

向來熱愛運動嘅廖慧儀，近年愛上跑步，最近佢喺社交平台分享多張跑步相，原來成功完成慈善5K跑，仲攞埋獎牌，實在勁！

今次比賽對廖慧儀嚟講別具意義，因為佢曾經歷十字韌帶撕裂，從完全唔識跑步，到依家變成跑步迷，過程絕不簡單。

佢回憶三年前受傷嘅經歷：「當時因為工作學踩滑板，點知一個急停唔小心仆咗落地，『Park』一聲，即刻扭傷右腳膝頭，痛到大嗌… 真係痛到入心!!!!! 之後即刻坐輪椅上白車入急症室，照完X-ray發現骨頭無斷，心諗好彩。但再去私家醫院照MRI，報告話係十字韌帶第三級撕裂（完全撕裂），雖然未至於完全斷裂，但已經好嚴重。」

雖然唔使做手術，但復原過程極為漫長，甚至影響工作：「當時拎住兩支柺杖，行路極慢，成日出門都要帶住一堆檢查報告同醫生紙，四圍去醫院、診所複診，做物理治療，睇晒中醫、西醫、骨科，能做嘅都試晒，但都只能夠慢慢等好。原定工作都換人，之後兩個月工作亦被迫煞停。」

最嚴重嘅一次舊患復發，就發生喺去年去新西蘭拍攝《港女野人2》：「冰川登頂之後，唔止傷患膝頭痛，連好嗰隻都跟住痛，痛到頂唔住，要靠Panadol頂硬上，完成回程5小時落base camp，再落山完成玩命式21日拍攝。拍完之後，成個人跛住上機返香港，真係頂硬上！」

由受傷到依家已經三年多，今年，佢由完全唔識跑步變成跑步迷：「仲跑埋人生第一場5K比賽，仲攞埋獎，結果仲要傻更更唔知，搞到無上台攞獎，拎完參賽證就走咗。」

佢續說：「最近為咗練跑，召集朋友一齊組隊跑街，依家諗返起真係好神奇。一開始我超卻步，一嚟跑步好悶，二嚟舊患容易復發，5K都痛到頂唔順。之後決心準時食Supplement、保護關節、做負重訓練、Pilates，一星期操兩日跑、俾自己充足休息，結果真係無再痛，超感動！好想多謝所有陪我跑步嘅人，wohooo！一齊加油！」