蔡潔親揭被鞭打真相：全靠有練運動「我啲筋都好鬆」

《執法者們》現正熱播中，劇情講到周俊傑（黃宗澤飾）醒來後發現自己被困在一個巨大鐵籠裡，四周充滿了其他被關押的人。他趁機會逃走，但發現自己已身處公海，無處可逃。

原來周俊傑所在的地方便是戴祖福（林嘉華飾）的海上堡壘，當中他被迫參加比賽，與不同囚犯互相廝殺。

在今晚（14日）一集中，周俊傑終於在海上堡壘重遇太太何天茹（蔡潔飾），何天茹被吊起鞭打，手腳傷痕纍纍，令人心痛。

對於這場被鞭打的場口，蔡潔接受訪問時笑言經常被做人質：「我覺得幾好笑，因為之前做法醫被綁架，點知做海關都要被綁，希望下次唔使再被人綁。」

她指拍攝這場戲用了一天的時間：「雖然我要被吊起，但我覺得可以handle，因為我有練開瑜伽，雙手舉高郁動，就係正正平時做空中瑜伽動作，所以我成日都有練開，啲筋都好鬆，唔會太痛苦。」

蔡潔亦感激工作人員的照顧，令她在安心的環境下演繹。談到受鞭打的過程，她親揭真相：「其實係CG效果，做得好真實，所以聽到發一聲，我就要做被鞭打的反應。不過阿波（黃宗澤）被打嗰幾腳，就真係真實，所以大家覺得效果好好，我哋幾辛苦都值得。」

另外，蔡潔談到在鑽油台取景拍攝，直言很幸運能夠有此機會：「據聞係電視上嘅第一次，絕對係好難得嘅體驗。因為交通好唔方便，我哋啲演員真係要留到拍晒所有場口先可離開，加上拍攝地方時間所限，只有日頭可拍，因為晚上會好大風，而我哋係用發電機，發電時間有限，所以大家就會休息，呢個作息時間都幾好。」

她指整個團隊猶如家人一樣，大家合作得十分開心。

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。