黑色月光｜「智商7歲孫女」莊易羚原來係莊錠欣親家姐 拍劇做足準備能歌擅舞仲要精通德文

《黑色月光》自開播後除了各大主角相繼跑出，不少綠葉角色及新進演員亦贏盡焦點，大膽起用新人亦是劇集總監製佳導特色之一。昨晚（18日）台慶前夕播出的第16集，三大新演員均獲得一定程度發揮，分別是飾演「三重無間道」的卓昊天（郭鋒飾）私人助理Kenny（蔡誌恩飾）、「反骨女公關」洪詠詩（王嘉慧飾），及卓昊天「7歲智商孫女」Mable（莊易羚飾）。三位新人的演出除同樣令人眼前一亮，三位的背景亦各有各猛烈，絕對值得關注。

2022年加入無綫成為演員的Axity（原名莊茵棋），是曾到韓國發展藝人莊錠欣家姐。雖然拍劇經驗淺，但在《黑色月光》已要挑戰智商只有7歲的智障女孩角色，除了要演繹天真活潑面，又要根據劇情撒嬌、任意發脾氣及表現膽小驚青面，加上與視后級楊茜堯有對手戲，對新人來說絕非易事！Axity受訪時透露當初試鏡是試年青版三姊妹的劇本，想不到後來卻得到現在這個角色，令她既驚且喜。

之前在親妹貼心指導下、憑在《愛‧回家之開心速遞》大晒流利韓文備受關注的Axity，透露今次Mable一角，妹妹亦有給予寶貴意見：「接到呢個角色後我有同妹妹講，妹妹都話：『嘩！咁有挑戰性，好期待你會點樣演』，因為始終佢喺呢行係前輩，我好多嘢都會請教佢，同埋我哋自細已經好好傾，所以佢都有畀少少提示我，例如唔好太刻意扮可愛，出到嚟觀眾會覺得唔自然。」

Axity自己亦同樣做足功課，近期拍劇機會浪接浪的她，透露每次接到一個新角色後都會為相關角色開「人物小傳」：「我會寫好晒角色背景、特色同想法。因為Mable係一個有大人外表嘅小朋友角色，我事前就特登睇咗阿旺、花家姐，同埋《I Am Sam》，去到現場再問監製（佳導）想要點，我好記得我問時張頴康就喺隔籬話『吓？有得揀架？』，最後佳導話只要天真漫爛就得，所以後尾我只係諗住『食瞓玩』去演，諗得太多觀眾透過對眼會睇得出，所以我就逼自己淨係諗好想食嘢、好想好開心。」她又笑言後悔拍攝時因太投入沒有「表情管理」，事後更感到後悔。

談到與視后楊茜堯對戲，Axity感激對方在其喊戲遇到困難時予以安慰：「茜堯本身係好開心嘅人，我記得有一幕話我唔見咗兔兔要搵番，嗰場戲要喊得好犀利，但我有Take唔係好喊到，茜堯就好好咁同我講：『傻豬嚟嘅，我哋又唔係水龍頭，你休息吓先啦，飲啖水，你喊到眼仔都乾晒喇。』」

Axity本身亦算多才多藝，三歲已開始學唱歌的她，入行前是教流行曲的歌唱老師（註：並非坊間所指的聲樂教師），並曾報名參加《聲夢傳奇》，可惜因為超齡未能入選！本身熱愛唱歌跳舞的她，於理工大學攻讀會計學工商管理學士課程時，已是Dance Society主席，閒時會與妹妹拍「孖妹跳舞片」過舞癮。外表被指酷似江若琳的Axity，於2021年曾參加國際小姐，並獲得香港區亞軍。雖然本身已是張張刀，但Axity仍有抽空自我增值，並已考獲B1級德語，證明已能應付日常德語文法基礎，並且聽說讀寫都達到能應付自如的地步。