異空感應｜鄭子誠重操故業演奸角事前零信心！難忘與已故藝人鄭啟泰對戲：諗番套劇我會摷番同佢影嘅合照

《異空感應》除大膽起用年青演員擔正做男、女主角，劇集更善用了無綫演技實力出色的綠葉演員。首星期的單元，監製王心慰（Amy姐）一口氣晒冷了三大好戲綠葉，分別是魯振順（阿旦）、第一代及新一代「奸人專業戶」鄭子誠與陳少邦，當中兩代奸人子誠與少邦更有不少精彩對壘場面。

鄭子誠接受tvb.com專訪時大讚奸角接班人陳少邦謂：「我同少邦合作好過癮，因為我冇做奸角好耐，我好多時唔太sure自己嘅反應會否太大或者under咗，呢套劇我最多對手戲就係少邦，好多時我哋交手時，我會見畀佢嘅反應inspire到我，令到我知道點調節去balance番件事。」近年漸漸淡出奸角系列的子誠，笑言當初Amy姐找他「重操故業」時，他確實有所擔心：「因為我已經從良咗一段時間，但今次個角色都算係衰到無倫，我有啲擔心自己回復唔到當年嘅境界，點知做落發覺，原來桐油埕始終都係裝桐油，無論我點樣做好人都好，始終都有啲衰底。」

子誠又謂回想拍攝《異空感應》時不無唏噓：「呢個劇我有好幾個場口同啟泰有對手戲，但拍完呢套劇一段時間後佢就離開咗，當諗番套劇我都有摷番同佢影嘅合照（嚟睇），係有啲感嘆同唏噓。」其實除了子誠，不少網民一再見到已故藝人鄭啟泰有遺作推出均不無唏噓，讚嘆他是很努力的藝人之餘，亦指他可塑性高，扮乜似乜。翻查資料，鄭啟泰今年內共有九套參演劇集面世，分別為年頭播出的《旁觀者》、《本尊就位》(鄭啟泰於劇集播映期間離世)，及離世後播出的《再見·枕邊人》、《逆天奇案2》、《反黑英雄》、《企業強人》、《巾幗梟雄之懸崖》、《黑色月光》及《異空感應》。