《試真 D》江美儀率4位TVB型男走訪廣東食店景點 珠海首集試素「威靈頓牛扒」夠驚喜

TVB推出全新綜藝節目《試真 D》，4月13日起逢星期一至五晚10時30分喺翡翠台播。節目由江美儀、周嘉洛、朱敏瀚、吳業坤同曾展望首次合體做主持，帶觀眾走訪廣東省多個城鎮，跟住內地極具公信力嘅社交生活平台深入各區，專門揀啲評分好兩極嘅餐廳同人氣網紅景點做實地評測。主持團隊用偵探式求真態度，追查評分背後嘅真相。為隆重其事，TVB昨日（9日）開記者會公布節目詳情。

《試真 D》由劉詩樺、梁志康監製，鄧惠儀、陳嘉儀任編審。節目每集會揀三至四個高分或者低分嘅餐廳同景點，主持先拆解網上評語營造懸念，再加設「景點照騙」環節同現場實況對照，最後落「真實判決」，等觀眾睇清邊啲真係好、邊啲其實中伏。

下周一（13日）播出首集，江美儀、周嘉洛同吳業坤會一齊去到近期大熱、而且可以港車北上嘅珠海。第一站三人先試厚切豬扒，之後轉場去海鮮大排檔，挑戰網上負評爆燈嘅「香酥一口鮑」。最後再去一間清幽素菜店，竟然有驚喜！當中黑松露繡球菇又鮮又香、又爽脆；至於素食版「威靈頓牛扒」外形幾可亂真，入口層次豐富，連美儀姐都忍唔住話：「好食到唔記得自己食緊齋！」

五位主持江美儀、周嘉洛、朱敏瀚、吳業坤同曾展望喺記者會分享拍攝期間嘅趣事同挑戰；其後仲即場試食外表好相似、但價錢分別屬平價親民、中檔品味同高級奢華三個檔次嘅蛋卷同龍鬚糖，即席判斷價錢同味道再打分，重現節目入面「賣相滿分、味道零分」嘅「中伏」場面，氣氛搞笑又熱鬧，為宣傳活動加咗唔少「趣」味。

除咗上述五位主持，出席記者會嘅仲有：電視廣播有限公司製作部助理總監（非戲劇製作）（創作）鄧煒鵬、助理經理(非戲劇製作)(綜藝)暨監製劉詩樺及製作主任（非戲劇製作）暨監製梁志康、節目產品贊助李眾勝堂保濟丸首席財務官余振球、財務副總裁陳達鴻；記者會司儀由林秀怡擔任。

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。