《中年好聲音4》莫家淦死都唔肯同老婆講肉麻嘢海兒一句反擊問到佢語塞

Release date: 2026-05-08 16:00 | Entertainment News

《中年好聲音4》本周日（10日）播映「人生之歌」上半場，撞正母親節，多位選手趁住呢個日子喺台上唱歌歌頌親恩。莫家淦就揀咗《今生今世》送畀老婆，多謝對方一直盡心盡力打理屋企照顧家庭，成段表白又感人又幾搞笑。

家淦自爆一向唔識講肉麻說話，車婉婉即刻追問：「你係嗰啲傳統男人唔講我愛你？」家淦尷尬應：「係囉。」畀車婉婉催到冇得走，家淦唯有Chok樣對住鏡頭笑住講「I Love You」，仲話：「嬉皮笑臉咁就講到，但要認真講就講唔到。」之後佢收起笑容，講到想借《今生今世》嘅歌詞同太太講，嚟生如果仲有機會都想繼續一齊。

海兒聽完都好奇，追問家淦點解講唔到肉麻嘢。點知家淦即刻反問一句：「海兒老師你拍過拖未？」海兒即時尷尬「嘩」一聲避答。家淦就坦言拍拖嗰陣會同老婆拖手，但有咗兩個小朋友之後，就變咗各自拖住一個。呢個時候海兒語出驚人：「你冇得拖佢，咀咪肉麻啲囉！」即刻笑爆全場。