《藍朋友•旅朋友》港姐華姐接力亮相 鍾嘉欣激動落淚盡訴心聲

《藍朋友•旅朋友》以貼地風格，深入走訪廣西、福州及溫哥華三大城市，並邀請多位新舊老友記鍾嘉欣、岑麗香、張嘉兒、鄧佩儀、劉倬昕、潘靜文、吳兆麟，以及太太李亞男輪流為觀眾推介三地特色玩樂景點。祖藍兩名愛女 Gabby 及 Hayley 亦會參與部分行程，絕對係寓工作於家庭樂。

一眾舊老友記之中，鍾嘉欣（Linda）、岑麗香同祖藍相識多年，二人更加係李亞男嘅閨密。據知，Linda 同香香會喺節目中同祖藍傾心事，其中 Linda 更講到雙眼通紅兼哽咽，期間一度激動到青筋都現埋，絕對係毫無保留盡訴心中情。

今晚（14日）播出嘅第一集係《藍朋友·旅朋友 廣西篇》，而同祖藍玩盡廣西嘅老友，就係祖藍喺《福祿壽訓練學院》嘅學員吳兆麟 Alan。二人先後到南寧市中心夜市掃街、品嘗南寧特色老友粉同八仙粉，亦有參觀佔地527畝嘅李寧體育園。除咗同中國前乒乓球世界冠軍謝超傑切磋球技，仲去到園內嘅運動康復中心，體驗令二人叫苦連天嘅復康治療，「嗌痛表情包」保證有趣。

當中夜市掃街絕對係「好睇好食又有趣」，事緣祖藍以「冇錢」為理由，強調只可以用100元人民幣掃街。結果二人唔單止買齊特色美食螺螄牛雜、炸昆蟲、酸辣水果、2杯蔗汁雷公根、蒸餃及蒸角，最後仲剩低8蚊人仔，相當超值！之後二人更率性坐喺街頭開懷大吃，而觀眾最期待嘅畫面，自然係祖藍同 Alan 點樣 Handle 賣相趕客嘅「炸昆蟲雜錦」。不過二人竟然意外地冇食到吚嘩鬼叫，祖藍仲笑言味道極似炸薯條，Alan 更一邊食一邊展現超高 EQ；更搞笑嘅係，Alan 掃街期間，竟然意外展現貪靚一面。

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。