《藍朋友·旅朋友》王祖藍孖潘靜文福州覓食！神還原姚焯菲語氣爆笑到停唔到

TVB 綜藝旅遊節目《藍朋友·旅朋友》由王祖藍主持，走訪廣西、福州及溫哥華三大城市，一連三星期逢周一至五翡翠台晚上 10 點半播映。

今個星期播出的《藍朋友·旅朋友 福州篇》，祖藍同劉倬昕（阿 Sam）一同暢遊福州。節目今晚（22日）更邀請近期因《愛·回家之三代同糖》「女版 Terry」莫希靈一角人氣急升的潘靜文（Sherman）擔任飛行嘉賓，陪祖藍一齊「食好西」。

當晚祖藍先後帶同阿 Sam及Sherman走訪倉山區與台江區，除了品嚐當地馳名美食「蒸鱘飯」、「鍋邊」、「油餅」、「三角糕」等，亦有「盲盒燉罐」等估你唔到的玩法；同時祖藍更大廚上身親自炮製港式美食「酥炸生蠔」、「辣酒煮花螺」、「豉椒炒魷」，宴請一班大學生。期間本以為阿 Sam可以從旁幫手，怎料她全程行行企企，甚至連幫手攞蠔油都一臉迷惘，令祖藍直言無奈。

不過，當大學生實際品嚐到祖藍手勢後，個個都大讚好味。祖藍亦分享昔日在演藝學院的逸事，當中更透露得知有女同學主修英文後，即即要求對方用英文形容自己；對方呆望了數十秒才吐出形容詞，場面搞笑，亦見到祖藍同大學生之間絕無年齡代溝。

節目中祖藍亦透露，因福州美食多，故想邀請一位「好擦得」新一代藝人作「飯腳」，結果身邊多人力薦Sherman。Sherman自認是「大胃王」，祖藍看住她纖瘦身形忍不住懷疑：「有冇搞錯呀！咁瘦嘅？」並打趣她是另一種「我好男人頭㗎」類型的人；面對質疑，Sherman即自認好Man，仲做出「手瓜起𦟌」的動作，相當搞笑。

今集最爆位之一，是祖藍竟帶Sherman到台江區品嚐港式點心。Sherman一聽即做出「黑人問號」表情，並吐槽：「吓？你完全係同我之前去新西蘭搵Chantel一樣，然後佢帶我去食一啲亞洲嘢，即係嗰啲『叻沙』呀。」兩人隨即神同步模仿姚焯菲的可愛表情和語氣：「全新西蘭最好食嘅叻沙呀！」

祖藍亦深有同感，笑指自己每次去溫哥華探朋友，對方總會帶他去吃「全溫哥華最好食的雲吞麵」，非常無奈。不過最後祖藍亦解開Sherman謎團：除了想讓她試點心是否夠正宗及適合港人口味，更重要是餐廳裝潢極具特色，是近年文青打卡熱點。Sherman亦大讚環境舒適，外圍紅磚牆更有香港「大館」風味。

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。